புதுச்சேரி யூனியன் பிரதேசம் காரைக்காலை அடுத்த வரிச்சிக்குடியில், விசாரணைக்காக அழைக்கச் சென்றபோது வீட்டை உட்பக்கமாக பூட்டிக் கொண்ட சாராய வியாபாரி, மாவட்ட எஸ்.பியின் கண் முன்பே ஆய்வாளரை ஒருமையில் ஆபாசமாகப் பேசி மிரட்டிய நிலையில், போலீசார் பொறுமையாகப் பேசி அவரை தங்களது பொறியில் சிக்க வைத்தனர்.

காரைக்கால் மாவட்டத்தில் குற்ற பதிவேட்டில் இடம் பெற்றுள்ள குற்றவாளிகள் மற்றும் ஜாமீனில் வெளியில் உலவும் குற்றவாளிகள் ஆகியோரை அடையாளம் கண்டு அவர்களை காவல் நிலையம் அழைத்து சென்று விசாரிப்பதற்கான ஆப்ரேஷன் திரிசூலம் என்ற திட்டம் கடந்த மாதம் துவங்கி நடைபெற்று வருகிறது.

வரிச்சிக்குடியில் உள்ள சாராய வியாபாரி பாம் ராஜா என்பவரது வீட்டிற்கு மாவட்டக் காவல் கண்காணிப்பாளர் தலைமையில் குழுவாகச் சென்ற போலீசார், அவரை விசாரணைக்கு அழைத்துள்ளனர். வீட்டை உட்பக்கமாகப் பூட்டிக் கொண்ட பாம் ராஜா, ஜன்னல் வழியாக, தான் ஆளும் என்.ஆர்.காங்கிரஸ் கட்சியைச் சேர்ந்தவன் என்றும் எம்.எல்.ஏ சொன்னால்தான் வருவேன் என்றும் கூறினார். வேட்டியை மடித்துக் கட்டி போலீசாரைப் பார்த்து ஒருமையில் அவர் வசைபாடத் தொடங்கினார்.

தாம் சாராயம் விற்று வந்தது உண்மைதான் என்றும் ஆனால் 3 மாதங்களுக்கு முன்பே அதனைக் கைவிட்டு பைனான்ஸ் தொழில் செய்து வருவதாகவும் கூறிய பாம் ராஜா, காவல் ஆய்வாளர் குமரன் தன்னைப் பழிவாங்குவதாகக் கூறி, அவரை ஆபாசமாகவும் ஒருமையிலும் மிரட்டினார்.

தாங்கள் விசாரணைக்குத்தான் அழைப்பதாகவும் விசாரணை முடிந்தவுடன் வீட்டுக்குச் சென்றுவிடலாம் என்றும் எஸ்.பி உறுதியளித்ததைத் தொடர்ந்து, நீண்ட நேரமாக வாக்குவாதம் செய்த பாம் ராஜா, பூட்டைத் திறந்துகொண்டு வீட்டை விட்டு வெளியில் வந்தார். அவரைக் காவல் நிலையம் அழைத்துச் சென்ற போலீசார், அரசு ஊழியரைப் பணி செய்ய விடாமல் தடுத்ததாக வழக்குப்பதிந்து நீதிமன்றத்தில் ஆஜர்படுத்தி சிறையில் அடைத்தனர்.