நாகர்கோயில் கோட்டார் அருகே பூட்டப்பட்ட வீட்டிற்குள் நுழைந்த கொள்ளையர்கள் விளக்குகளை எரியவிட்டு சாவகாசமாக கொள்ளை முயற்சியில் ஈடுபட்ட நிலையில், சிசிடிவி கேமரா மூலம் வெளிநாட்டில் இருந்து இதனை பார்த்த வீட்டின் உரிமையாளர், பக்கத்து வீட்டுக்காரர் மூலம் கொள்ளையர்களை விரட்டிஅடித்தார்

வீட்டில் சுண்ணாம்பு அடிக்க வந்தவர்கள் போல கையில் பொருட்களுடன் ரொம்ப சாவகாசமாக உலவுறாங்களே இந்த இருவர் தான் அந்த கைப்புள்ள கொள்ளையர்ஸ்..!

கன்னியாகுமரி மாவட்டம் நாகர்கோயிலை அடுத்துள்ள கோட்டார் பகுதியை சேர்ந்தவர் சலீம், சவுதி அரேபியாவில் குடும்பத்துடன் தங்கி பணிபுரிந்து வருகிறார். இங்குள்ள இவரது வீட்டிற்குள் செவ்வாய்கிழமை இரவு 11.41 மணிக்கு வீட்டின் முன்பக்க கதவை உடைத்து இரு திருடர்கள் புகுந்தனர். சிசிடிவியில் அப்போதே இருவரும் பதிவான நிலையில் முன்பக்க கேமராவை உடைத்து சேதப்படுத்தினர் அந்த அப்ரண்டிஸ் கொள்ளையர்கள்.

தொடர்ந்து வீட்டுக்குள் புகுந்த கொள்ளையர்கள் கையோடு டார்ச் லைட் எதையும் எடுத்து வராததால், வீட்டிற்குள் விளக்குகளை எரியவிட்டு, எதை எடுப்பது எதை விடுவது என்று குழப்பத்தில் ஒவ்வொரு அறையாகச் சுற்றினர்

ஒரு லாரி கொண்டு வந்திருந்தா மொத்தமாக ஏற்றிச்சென்றிருக்கலாம் என்று சாவகாசமாக தரையில் அமர்ந்து ஒவ்வொரு அறையாக இரும்பு கம்பியால் உடைக்கும் முயற்சியில் ஈடுபட்டனர்.

இந்த காட்சியை, அந்த வீட்டில் உள்ளே பொருத்தப்பட்டு இருந்த சிசிடிவி கேமரா மூலமாக வெளிநாட்டில் இருந்தபடியே வீட்டு உரிமையாளர் சலீம் தனது செல்போனில் பார்த்து அதிர்ச்சி அடைந்தார்.

உடனடியாக தனது பக்கத்து வீட்டிற்கு தொலைபேசி மூலமாக அவர் தகவல் கொடுத்து அலர்ட் செய்தார். பக்கத்து வீட்டில் உள்ளவர்கள் விரைந்து வந்து வெளியின் நின்ற படியே திருடன், திருடன் என கூச்சலிட்டதால் , தாங்கள் வலையில் சிக்கியதை உணர்ந்த இரு கைப்புள்ள கொள்ளையர்களும் கையோடு எடுத்து வந்திருந்த கொள்ளை கருவிகளை அங்கேயே போட்டு விட்டு, பின்பக்க இரும்பு கேட்டை திறந்து கொண்டு சுவரில்ஏறி புதருக்குள் குதித்து தப்பி ஓடினர்

பக்கத்து வீட்டுக்குகாரர்கள் டார்ச் லைட் வெளிச்சத்தில் கொள்ளையர்களை தேடினர். ஆனால் இருவரும் சிக்கவில்லை. சிசிடிவியின் உதவியால் வீட்டின் கொள்ளை முயற்சி தடுக்கப்பட்டதாக கோட்டார் போலிஸார் தெரிவித்தனர். கொள்ளை முயற்சியை கண்டு மிரண்டு போன வீட்டு உரிமையாளர் அவசரமாக புறப்பட்டு சொந்த ஊருக்கு திரும்ப இருப்பதாக உறவினர்கள் தெரிவித்தனர்.

அதேபோல கிருஷ்ணகிரி மாவட்டம் காவேரிப்பட்டினம் புறவழிச் சாலையில் , துணியால் மூடப்பட்டிருந்த நிர்மல் என்பவரின் காபி ஷாப்பிற்குள் எளிதாக புகுந்த கொள்ளையன், அங்கிருந்த மிக்ஸி, 70 ஆயிரம் ரூபாய் பணம் உள்ளிட்டவற்றை தூக்கிச்சென்றான்

கடையின் மாடியில் படுத்திருந்த நிர்மல் சத்தம் கேட்டு தடுக்க வந்ததால் அவரது தலையில் , சிசிடிவி மானிட்டரால் தாக்கிவிட்டு தப்பிச்சென்றதாக கூறப்படுகின்றது. தலையில் காயத்துடன் நிர்மல் காவேரிபட்டினம் மருத்துவமனையில் சிகிச்சைக்காக அனுமதிக்கப்பட்டுள்ளார்.