64 நாட்களாக நடுக்கடலில் மூங்கில் படகில் உயிரை கையில் பிடித்துக் கொண்டு தவித்தவரை, சென்னை காசிமேடு மீனவர்கள் மீட்டு பத்திரமாக கரைக்கு கொண்டு வந்தனர்.

கடலில் மூங்கில் படகுடன் தத்தளித்தேன்.. மற்றவர்கள் சாப்பிட உணவு கொடுத்தனர்... ஆனால் யாரும் உடன் அழைத்து செல்லவில்லை... நான் இந்த நாட்டை சேர்ந்தவன் என்று... சைகையால் மியான்மர் நாட்டு பணத்தை தூக்கி காண்பிக்கும் இவர் தான் சனாமாமா..!

சென்னை காசிமேடு பகுதியைச் சேர்ந்த வினோத் தனக்கு சொந்தமான விசைப்படகில் கடந்த 28ஆம் தேதி அன்று அதிகாலை மூன்று முப்பது மணி அளவில் காசிமேடு மீன்பிடி துறைமுகத்தில் இருந்து ஆழ்கடலில் மீன் பிடிப்பதற்காக ஏழு மீனவர்கள் சென்றனர்.

நடுக்கடலை நோக்கி சென்றபோது அவர்களை நோக்கி மூங்கிலால் ஆன படகு ஒன்று மிதந்து வந்து கொண்டிருப்பதை பார்த்த மீனவர்கள், தங்கள் படகின் வேகத்தை குறைத்தனர். அருகில் வந்த நிலையில் அந்த மூங்கில் படகில் இருந்த ஒருவர் சைகை காட்டி கொடியசைத்தார்.

உடனடியாக விசைப்படகு ஓட்டுநர் லோகு என்பவர் அருகில் சென்று பார்த்த பொழுது , சைனீஸ் பாஷை போல பேசிய ஒருவர் கையெடுத்து கும்பிட்டு காப்பாற்றுமாறு கேட்டுள்ளார். நீண்ட நாட்களாக கடலில் தவிப்பதாக கதறி அழுததால் அவரை மீட்டு தங்கள் படகில் ஏற்றியதோடு, தாங்கள் மீன்பிடிக்கும் பணியை கைவிட்டு, உடனடியாக அவரையும் அவரது படகையும் பத்திரமாக கரைக்கு கொண்டுவந்து சேர்த்தனர்.

காசிமேடு மீன்பிடி துறைமுகம் கொண்டுவரப்பட்ட அவரை கடலோர காவல் படையினரிடம் ஒப்படைத்தனர். விசாரணையில் மியான்மர் நாட்டை சேர்ந்த மீனவரான சானாமாமா என்ற பெயருடைய அவர் கடந்த 64 நாட்கள் கடலில் தத்தளித்ததாக தெரிவித்தார். அவருடன் வந்த மீனவர்களின் நிலை என்ன என்பது தெரியவில்லை. அவரை தூதரகம் மூலம் அனுப்பி வைக்க தேவையான நடவடிக்கை மேற்கொள்ளப்பட்டு வருகின்றது.