வாயைக் கட்டி, வயித்தைக் கட்டி ஃபீசும் கட்டி படிக்க வைத்தால், ஃபோன் பாக்க விடலைன்னு உயிரை மாய்த்துக் கொள்கிறார்களாம் டீன் ஏஜ் பசங்க. மொபைல் மனிதர்களை அடிமையாக்குவது எப்படி? அறிகுறிகள் என்ன? தடுப்பது எப்படி? என்பதைத் தற்போது பார்க்கலாம். .

‘2 நாள்ல எக்ஸாம். எவ்ளோ நேரம் அதையே பாப்ப?..... ஃபோன வை’ இந்த வார்த்தைகள் தான் பெங்களூருவில் உள்ள தாயார் ஒருவர் சொன்னது. ஃபோனைப் பயன்படுத்தாமல் இருக்கமுடியாது, அதற்கு உயிரைவிடுவதே மேல் என 20-வது மாடியிலிருந்தே குதித்து இறந்துவிட்டார் மாணவி அவந்திகா.

15 ஆண்டுகளாக அந்தக் குழந்தையை வளர்த்தெடுக்க இரவும் பகலும் பெற்றோர் பட்ட பாடு ஒரே நொடியில் அதுவும் ஸ்மார்ட்ஃபோனால் சிதறிப்போயிருக்கிறது.

மற்றொரு வீடியோவில் அடிபட்ட நண்பன் துடித்துக் கொண்டிருக்க ஆம்புலன்ஸ்-க்கு அழைப்பதற்காக போனை எடுத்ததையே மறந்துபோய் இன்ஸ்டாகிராம் ரீல்ஸில் மூழ்கிப் போனது பற்றிய காமெடி விழிப்புணர்வு வீடியோ சமீபத்தில் இணையத்தில் அதிகம் பகிரப்பட்டது.

அப்படித்தான் சில வேலைகளுக்காக போனை எடுத்தால், எடுத்த காரணத்தையே மறந்து போய் சமூக வலைதளங்களில் மூழ்கிவிடுவது எல்லாம் தற்போது பலருக்கும் சாதாரணமாக இருக்கிறது. பல மணி நேரங்களுக்குப் பின்னரே, போனை எதற்கு எடுத்தோம் என நினைவுக்கும் வருகிறது.

உங்களை அடிமைப்படுத்த போன் தயாரிப்பு நிறுவனங்கள் என்ன செய்கிறது தெரியுமா?

திரையில் இருக்கும் கலர், சவுண்ட், வைப்ரேசன் என அனைத்துமே உங்களை அடிமையாக்கும் வகையில்தான் டிசைன் செய்யப்பட்டு உள்ளதாக உண்மையை ஒப்புக் கொண்டவர்தான் கூகுள் டிசைன் எதிசிஸ்ட் ட்ரிஸ்டன் ஹேரிஸ்.

Pull to refresh, போனில் நோட்டிஃபிகேஷன் பார்க்க மேலிருந்து கீழ் ஸ்வைப் செய்வது கூட உங்களை அடிமைப்படுத்த என்ன செய்யலாம் என்பதற்காகவே செல்போன் நிறுவனங்கள் ஆய்வு செய்து கண்டறிந்துள்ள ட்ரிக்குகளாம்.

ஸ்மார்ட்போன் பயன்படுத்துபவர்களில் பாதிக்கும் மேற்பட்டோர் தினமும் 5 முதல் 6 மணி நேரம் போன் பயன்படுத்துகின்றனராம். உலகளவில் 430 கோடி பேர் போனுக்கு அடிமைகளாக உள்ளனராம்.

இந்த அடிமைத்தனம் தொடர் கதையாவதால் உண்மையான வாழ்க்கையிலும், உறவிலும் இருக்கும் பொறுப்புக்களை அவர்கள் தட்டிக்கழிக்கின்றனர். மேலும் என்னென்ன பாதிப்புக்கள் ஏற்படுகின்றன? தெரியுமா?

தூக்கம் வராமல் போன் பார்த்தல், மன அழுத்தம், கவனித்தல் குறைபாடு, கிரியேட்டிவிட்டி பிளாக் ஆவது, தனிமை, உறவுகள் பாதித்தல், அச்ச உணர்வு,
மதிப்பெண் குறைதல், மறதி போன்ற உளவியல் ரீதியான பிரச்னைகள் ஏற்படுமாம்.

ஏன் இப்படி ஏற்படுகிறது தெரியுமா?

ஃபோனுக்கு அடிமையானால் மூளையில் GABA ((gamma-aminobutyric acid )) என்ற ஆசிட் அதிகம் சுரக்கும். நியூரோ ட்ரான்ஸ்மிட்டர்கள் பாதிக்கும். அது போதை வஸ்து பயன்படுத்தும்போது எப்படி மூளையின் கிரே ஏரியா ஷட் டவுன் ஆகுமோ அப்படி ஒருவரை அடிமைப்படுத்துமாம். எனவே அதைத் திரும்பத் திரும்ப பயன்படுத்தத் தூண்டும்.

போனைப் பயன்படுத்தக்கூடாது என தடுக்கும் போது உயிரையே மாய்த்துக் கொள்ளும் டீன் ஏஜர்களில் பெண்கள் தான் அதிகம் என அமெரிக்க நோய்த்தடுப்பு மற்றும் கட்டுப்பாட்டுத் துறை கணித்துள்ளது.

சரி, என்னென்ன அறிகுறிகள் இருந்தால் அடிமையாகிவிட்டனர் எனக் கண்டறிவது எனப் பார்க்கலாம்.

நெருங்கிய உறவுகளிடம் இருந்து விலகுதல், உறவுகளால் சுட்டிக்காட்டப்படுதல்,
யாருடனும் தொடர்பு இல்லாது இருத்தல், கொடுத்த வேலையை முடிக்க முடியாது இருத்தல், போன் பார்ப்பதைத் தடுத்தால் முரட்டுத்தனமாக கத்துவது, கோபம் கொள்வது,
தனிமை கிடைத்த மறு நிமிடமே போனை எடுப்பது, ரிங்டோன் கேட்காமலே கேட்பது போல் உணர்தல், யாருக்கும் பலனின்றி இருப்பதால் உயிரை மாய்த்துக் கொள்ளலாமா? என்ற உணர்வு வருதல் ஆகியவை இதன் டேஞ்சரான அறிகுறிகளாம்.

சிறியவர்கள் மட்டுமல்ல. வயதானவர்கள் பலருமே இதில் பாதிக்கப்படுகிறார்களாம்.

உங்கள் வீட்டில் யாரேனும் அப்படியிருந்தால் அரசின் இலவச ஹெல்ப்லைனான 104 என்ற எண்ணுக்கு அழைக்கலாம்.

எனவே, உங்கள் உறவுகளிலோ, குடும்பங்களிலோ அதிகம் போன் பயன்படுத்தும் டீன் ஏஜ் பசங்க வைத்திருக்கும் பெற்றோர்களுக்கும் இந்த வீடியோவைப் பகிர்ந்து விழிப்புணர்வு ஏற்படுத்துங்கள்.