தமிழ் திரைப்பட இயக்குனர் பாரதிராஜாவின் மகன் மனோஜ் இருதய அறுவை சிகிச்சை முடிந்து வீட்டில் ஓய்வு எடுத்துவந்த நிலையில் திடீரென உயிரிழந்தார் . அவருக்கு வயது 48. குறைந்த வயதில் மனோஜ் மரணமடைந்திருக்கும் சம்பவம் திரையுலகினரை அதிர்ச்சிக்குள்ளாக்கி உள்ளது

ஸ்டூடியோ அரங்கிற்குள் எடுக்கப்பட்ட தமிழ் திரை படப்பிடிப்புகளை, நதிக்கரைகளையும், வயல்காட்டையும் நோக்கி கட்டி இழுத்து வந்த பெருமைக்குரிய இயக்குனர் பாரதிராஜா..! இவர் தன்னுடைய பெருமைக்குரிய அறிமுகமாக தனது மகன் மனோஜை தாஜ்மகால் படத்தின் மூலம் தமிழ் திரையுலகில் நாயகனாக களமிறக்கினார்..!

தாஜ்மஹால் படத்தில் சொந்தக்குரலில் ஈச்சி எலுமிச்சி என்ற பாடலையும் பாடினார்

கடல் பூக்கள், அல்லி அர்ஜூனா, வருஷமெல்லாம் வசந்தம், ஈரநிலம் உள்ளிட்ட படங்களில் நாயகனாக நடித்து வந்தார்

நாயகனாக நடித்த படங்கள் பெரிய அளவிலான வெற்றியை எட்டாவிட்டாலும் மனோஜ் துணை கதாபாத்திரங்களில் நடித்த சமுத்திரம் , மகா நடிகன், மாநாடு உள்ளிட்ட படங்கள் அவருக்கு பெரிய பெயரை அவருக்கு பெற்றுக் கொடுத்தது. பாரதிராஜாவின் இயக்கத்தில் அன்னகொடி படத்தில் வில்லனாகவும் மிரட்டினார்

சாதுர்யன் படத்தில் தன்னுடன் இணைந்து நடித்த நடிகை நந்தனாவை காதலித்து திருமணம் செய்து கொண்டார்.

தந்தையை போலவே இயக்குனராகும் ஆசையில் மார்கழி திங்கள் என்ற படத்தை இயக்கினார். கடைசியாக விருமன் என்ற படத்தில் கார்த்தியுடன் நடித்திருந்தார்.

தொடர்ந்து சினிமாவில் பல்வேறு தளங்களில் இயங்கிக் கொண்டிருந்த மனோஜுக்கு கடந்த மாதம் இருதய அறுவை சிகிச்சை மேற்கொள்ளப்பட்டது .

25 நாட்களுக்கும் மேலாக சென்னை சேத்பட்டில் உள்ள தனது வீட்டில் ஓய்வெடுத்து வந்தார். செவ்வாய்கிழமை மாலை படுத்து உறங்கிய அவர் எழுந்திருந்த சில நிமிடங்களில் மயக்கம் வருவதாக கூறி கீழே விழுந்ததாகவும், அடுத்த சில நிமிடங்களுக்கெல்லாம் அவர் உயிர் பிரிந்ததாகவும் உறவினர்கள் தெரிவித்தனர்.

மனோஜுக்கு 48 வயதே ஆகும் நிலையில், தனது ஒரே மகன் உயிரிழந்த செய்தி கேட்டு இயக்குனர் பாரதிராஜா பேரதிர்ச்சி அடைந்தார்.

கனத்த இதயத்துடன் பனையூரில் உள்ள வீட்டில் இருந்து மகனின் வீட்டிற்கு வந்த அவர், மகனின் உடலைக் கண்டு கதறி அழுதார்.

பல்வேறு திரையுலக பிரமுகர்கள் மனோஜின் உடலுக்கு அஞ்சலி செலுத்தி வருகின்றனர். மனோஜ் மறைவிற்கு முதலமைச்சர் மு.க.ஸ்டாலின், இசைஞானி இளையராஜா மற்றும் திரையுலகினர் இரங்கல் தெரிவித்துள்ளனர்