சாலையில் சென்ற இரு கார்கள் உரசிக் கொண்ட விவகாரத்தில் சமரசம் பேசுவது போல அழைத்து கார் ஓட்டுனரை சரமாரியாக தாக்கும் காட்சிகள் தான் இவை..!

பூந்தமல்லி டிரங்க் சாலை, பேருந்து நிலையம் அருகே சாலையில் சென்று கொண்டிருந்த இரண்டு கார்கள் ஒன்றோடு ஒன்று உரசி கொண்டன. கார்களை ஓட்டி வந்தவர்கள் கீழே இறங்கி வாக்குவாதத்தில் ஈடுபட்டனர். அப்போது ஒரு காரில் இருந்து இறங்கி வந்த முதுகில் பை போட்டிருந்த இளைஞர், செல்போன் மூலம் பேசி சிலரை சம்பவ இடத்துக்கு வரவழைத்தார். இரு சக்கர வாகனத்தில் வந்த அந்த கும்பல், எதிர்தரப்பினரை தாக்குவது போல காரை சுற்றி சுற்றி வந்தனர்.

அதற்குள்ளாக சம்பவ இடத்துக்கு வந்த போக்குவரத்து காவல் உதவி ஆய்வாளர் ஒருவர், காரை சாலையில் இருந்து ஓரமாக எடுத்துச்சென்று நிறுத்தி பேசிக் கொள்ளுங்கள் என்று கூறியதால் காரை எடுத்துக் கொண்டு சாலையோரம் நிறுத்தினர். காரில் இருந்து இறங்கி வந்த ஓட்டுனரை சுற்றி வளைத்து வம்பிழுத்த எதிர்தரப்பினர் குத்துச்சண்டை வீரர்களை போல அவரை சரமாரியாக தாக்கினர்.

அந்த காரில் வந்த பெரியவர் ஒருவர் தடுக்க போராடியதோடு போலீசாரிடம் முறையிட்டார். இதையடுத்து கூட்டத்தை பயன்படுத்தி தாக்குதல் நடத்திய 4 பேரும் நைசாக அந்த இடத்தில் இருந்து ஒருவர் பின் ஒருவராக நழுவிச்சென்றனர்.

ஒரு தெருமுனையில் நின்று பேசிய அந்த மொபைல் குண்டர்கள் இரு சக்கர வாகனத்தை எடுத்துக் கொண்டு அங்கிருந்து தப்பிச்சென்றனர். காயம் அடைந்த ஓட்டுனர் தனியார் மருத்துவமனையில் சிகிச்சை எடுத்துக் கொண்டு வீடு திரும்பினார். போக்குவரத்து போலீஸ் முன்னிலையில், பட்டப்பகலில் நடத்தப்பட்ட அந்த தாக்குதல் சம்பவத்தின் வீடியோ வெளியான நிலையில், தாக்குதல் நடத்தியவர்களை போலீசார் தேடிவருகின்றனர்.