அமெரிக்காவின் லூசியானா மாகாணத்தில் உள்ள நியூ ஆர்லியன்ஸில் போர்பன் சாலையில் அதிகாலை 3 மணியளவில் புத்தாண்டு கொண்டாடிக்கொண்டிருந்த கூட்டத்திற்குள் திடீரென டிரக் ஒன்று புகுந்தது.



டிரக் மோதியதில் கொண்டாட்டத்தில் ஈடுபட்டவர்கள் பலர் தூக்கி வீசப்பட்டனர். ஓட்டுநர் கண்ணிமைக்கும் நேரத்தில் துப்பாக்கியால் சுடத் தொடங்கியதால் அப்பகுதியே அலறல் சப்தங்களால் கதிகலங்கியது. உடனடியாக சுதாரித்துக்கொண்டு காவல்துறையினர் திருப்பிச் சுட்டதில் ஓட்டுநர் சம்பவ இடத்திலேயே கொல்லப்பட்டார்.



இந்த தாக்குதல் சம்பவத்தில் 15 பேர் உயிரிழந்தனர்; 30க்கும் மேற்பட்டோர் படுகாயங்களுடன் மருத்துவமனையில் அனுமதிக்கப்பட்டனர். இத்தாக்குதலில் ஈடுபட்டவர் ஷம்சுதீன் ஜாபர் என்பதும், இவர் 13 ஆண்டுகள் அமெரிக்க ராணுவத்தில் பணியாற்றியிருப்பதும் தெரியவந்துள்ளது.



தாக்குதலுக்குப் பயன்படுத்தப்பட்ட வாடகை வாகனத்தில் ஐ.எஸ்.ஐ.எஸ் அமைப்பின் கொடி பறக்கவிடப்பட்டிருந்ததாலும், உள்ளிருந்த பெட்டியில் வெடிபொருட்கள் இருந்ததாலும் இது ஒரு தீவிரவாதத் தாக்குதல் என்று அமெரிக்க அதிபர் ஜோ பைடன் உறுதிபடுத்தியுள்ளார். "லோன் உல்ப்" அட்டாக் என கூறப்பட்டாலும் ஒருவர் மட்டுமே இத்தாக்குதலில் ஈடுபட்டிருக்க முடியாது என்றும் தாக்குதலின் பின்னணியில் பலர் இருக்கலாம் என போலீசார் சந்தேகம் தெரிவித்துள்ளனர்.



அமெரிக்காவின் நெவாடாவில் உள்ள லாஸ் வேகாஸ் நகரில் உள்ள அதிபராக தேர்வாகியுள்ள டிரம்ப்க்கு சொந்தமான ஹோட்டல் முன்பு நிறுத்தப்பட்டிருந்த டெஸ்லாவின் சைபர் டிரக் திடீரென வெடித்து சிதறியது.



இதில் தீயில் கருகி ஓட்டுநர் சம்பவ இடத்திலேயே உயிரிழந்தார். மேலும் ஏராளமானோர் காயம் அடைந்துள்ளனர். இந்த சம்பவத்தில் தீவிரவாத தொடர்பு இருக்க வாய்ப்பில்லை என்று அந்த நாட்டு போலீசார் தெரிவித்துள்ள நிலையில் பல்வேறு கோணங்களில் விசாரணையை தீவிரப்படுத்தியுள்ளனர்.



அமெரிக்காவின் நியூயார்க் நகரில் உள்ள அமாசுரா என்ற இரவு கேளிக்கை விடுதிக்கு அருகே நள்ளிரவில் மர்ம கும்பல் ஒன்று நடத்திய துப்பாக்கிச் சூட்டில் 10க்குமேற்பட்டவர்கள் படுகாயம் அடைந்துள்ளனர்.



புத்தாண்டை கொண்டாட கேளிக்கை விடுதியினுள் செல்வதற்காக காத்திருந்த 80-க்கும் மேற்பட்டோர் மீது 30 முறை துப்பாக்கியால் சுட்டதாக தகவல் வெளியாகியுள்ளது. இதில் படுகாயம் அடைந்தவர்கள் அங்குள்ள மருத்துவமனையில் அனுமதிக்கப்பட்டுள்ளனர். இந்த தாக்குதலில் தீவிரவாத தொடர்பு குறித்தும் விசாரித்து வருவதாக FBI அதிகாரிகள் தெரிவித்துள்ளனர்.


அமெரிக்கா மீதான எந்த தாக்குதலையும் நாங்கள் பொறுத்துக்கொள்ள மாட்டோம் என்றும், FBI விசாரணைக்கு உத்தரவிடப்பட்டுள்ளதாகவும் தொடர் தாக்குதல் சம்பவங்கள் குறித்து அதிபர் ஜோ பைடன் தெரிவித்துள்ளார்.

அமெரிக்காவை பார்த்து உலக நாடுகளே சிரிக்கும் அளவுக்கு தாக்குதல் சம்பவங்கள் நடத்துவருவதாகவும், பலவீனமான செயலற்ற தலைமையே இந்த தாக்குதல் சம்பவங்களுக்கு காரணம் எனவும் டிரம்ப் விமர்சித்துள்ளார்.



3 சம்பவங்களும் ஏதேச்சையாக நடந்தவையா? அல்லது திட்டமிடப்பட்டவையா? என்பதே FBI விசாரணையின் முதல் கோணமாக உள்ளது. ஐ.எஸ்.ஐ.எஸ் அமைப்பு ஏன் திடீரென அமெரிக்காவை குறிவைத்து இப்போது ஏன் தாக்க வேண்டும்? என்ற கேள்விக்கு பல் வேறு காரணங்கள் ஊ கிக்கப்படுகிறது



கடந்த டிசம்பர் மாதம் கிளர்ச்சியாளர்கள் வசம் சென்றுள்ள சிரியாவில் செயல்பட்டுவந்த ஐ.எஸ்.ஐ.எஸ் முகாம்கள் மீது அமெரிக்க வான்படை குண்டு வீசி தரைமட்டம் ஆக்கியதற்கு பழிக்கு பழிவாங்கும் விதமாக இந்த தாக்குதல் அரங்கேற்றப்பட்டிருக்கலாமா? என்ற கோணத்தில் அமெரிக்க உளவுத்துறை விசாரணை மேற்கொண்டுவருகிறது.