ஒன்னா கல்யாணம் பண்ணு, இல்ல வேலைய காலி பண்ணு என கராராக அறிவித்து சர்ச்சையில் சிக்கிய நிறுவனம் தனது நிபந்தனையை வாபஸ் வாங்கியிருக்கு. .

உலகிலேயே அதிக மக்கள் தொகை கொண்ட நாடாக இருக்குற சீனாவுல கல்யாணத்தையும், குழந்தை பெத்துக்கறதையும் வெறுத்து ஏராளமானவங்க சிங்கிள்ஸாவே சுத்திட்டு வர்றாங்க. இதனால அந்த நாட்ல முந்தைய ஆண்டுகள விட கல்யாணம் பண்றவங்களோட எண்ணிக்கை 20 சதவீதம் குறைஞ்சுருக்கு. இதை ஈடு கட்ட அந்நாட்டு அரசாங்கமும் என்னென்னவோ பண்ணி சிங்கிள்ஸ மிங்கிள் பண்ணி விட ட்ரை பண்றாங்க.

அதாவது காசு இல்லன்னுதான் கல்யாணம் பண்ணி குழந்தை பெத்துக்க மாட்டேங்குறீங்களா? பரவால்ல, குழந்தை பிறந்தா பிரசவ செலவு ஃப்ரீ, இன்சூரன்ஸ் ஃப்ரீ, செலவுக்கும் மானியமா பணத்தையும் ஃப்ரீயா தர்றோம். . குழந்தைய பாத்துக்க முடியலயா? சைல்ட் கேர் சென்டர்ல வெச்சு நாங்க பாத்துக்குறோம், நீங்க வேலைக்கு போய் சம்பாதியுங்க. உங்க குடும்பம் பெருசா இருக்கா? கவலைப் படாதீங்க நாங்க வீடு கட்டித் தர்றோம். அவ்ளோ ஏன்? அடல்டுகளுக்கு ஹெல்தப் பத்தின எஜூகேசன் கூட நாங்களே சொல்லித் தர்றோம் என பல சலுகைகளை வழங்குது சீன அரசாங்கம்.

ஆனாலும், ஸ்ட்ராபெர்ரி கண்ணே பாடலில் ‘உங்க கசமுசா கல்யாணம் தேவையில்லை’ என கஜோல் சொல்வது போல கல்யாணமே வேணாம், ஆள விடுங்க என சிங்கிள்ஸாகவே பலரும் சுற்றி வர்றாங்க. இதைப் பார்த்து மிக இளம் வயதில கல்யாணம் பண்ணினா அதுக்கும் நாங்க பணம் தர்றோம் என இறங்கி வந்தது அந்நாட்டு அரசு.

அதுவும் வேலைக்கு ஆகவில்லை என அறிந்த அந்நாட்டின் ‘த ஷூன்டியான் கெமிக்கல் குரூப்’ என்ற 1500 பணியாளர்களைக் கொண்ட தனியார் நிறுவனம் ஒன்றுதான் தனது சிங்கிள்ஸ் மற்றும் டிவோர்ஸ்டு ஊழியர்களுக்கு ஒரு அறிவிப்பை வெளியிட்டது..

‘ஏய், நீ ஒரு மாசத்துக்குள்ள கல்யாணம் பண்ணு, இல்லன்னா உனக்கு என்ன குறைன்னு நீயே உன்ன விமர்சிச்சு லெட்டர் எழுது. வேணா செப்டம்பர் மாசம் வரைக்கும் டைம் தர்றோம். அதுதான் லாஸ்ட். அதுக்குள்ள நீ கல்யாணம் பண்ணி செட்டில் ஆகலன்னா, உன்னை வேலைய விட்டு தூக்கிடுவோம்’னு சொல்லி சர்ச்சைய கிளப்பினாங்க.

ஆனால், ஊழியர்களின் பர்சனல் விஷயத்துல மூக்கை நுழைக்கக் கூடாதுன்னு சீன ஊழியர் சட்ட விதிகளை சுட்டிக் காட்டியதால இந்த உத்தரவு திரும்பப் பெறப்பட்டிருக்கு.

கல்யாணம் செய்வது என்பது பெற்றோருக்கு மகனாக மகளாக அவர்கள் ஆற்ற வேண்டிய கடமை என்றும், அந்த விசுவாசத்தை மறந்து நடந்து கொள்வது என்பது சீன பாரம்பரியத்துக்கு இழுக்கு என்றும் அந்த நிறுவனம் விளக்கம் அளிச்சுருக்கு. நீங்களும் முரட்டு சிங்கிள்னா, இதை பத்தி நீங்க என்ன நினைக்குறீங்கன்னு கமென்ட்ல சொல்லுங்க. .