அவனியாபுரம் ஜல்லிக்கட்டுக்காக வீட்டை மறித்து கட்டப்பட்ட தடுப்புக் கட்டைகளை அரிவாளால் வெட்டி நடிகரும் எழுத்தாளருமான வேலராமமூர்த்தியின் மனைவி மாநகராட்சி அதிகாரிகள் மற்றும் போலீசாருடன் வாக்குவாதம் செய்தார்.

கணவரின் ஒற்றை வார்த்தையால் பிரச்சனை முடிவுக்கு வந்த பின்னணி குறித்து விவரிக்கின்றது இந்த செய்தித்தொகுப்பு

மதுரை அவனியாபுரத்தில் ஜல்லிக்கட்டுபோட்டி நாளை நடக்கின்றது. அதற்காக ஜல்லிக்காட்டு போட்டி நடக்கின்ற தெருக்களின் இரு புறமும் வீடுகளை மறித்து கட்டைகளால் தடுப்பு அமைக்கப்பட்டுள்ளது. ஒவ்வொரு ஆண்டும் இந்த தடுப்பு கட்டும் போது வாடிவாசலில் இருந்து 20 மீட்டர் தூரத்தில் உள்ள வீட்டில் வசித்து வரும் நடிகரும் இயக்குனருமான வேலராமமூர்த்தி வழி விட்டு கட்ட சொல்வது வழக்கம்.

மாநகராட்சி ஊழியர்களும் ஒரு ஆள் எளிதாக சென்று வரும் வகையில் தடுப்புக்கட்டைகளை அமைப்பது வழக்கம். இந்த ஆண்டு ஜல்லிக்காட்டு விழாவுக்கான முன்னேற்பாடுகள் தொடங்கிய நிலையில் வேல ராமமூர்த்தி வீட்டில் ஆட்கள் இல்லாதால் எளிதில் யாரும் அந்த தடுப்புகளை தாண்டி உள்ளே சென்று வர இயலாத வகையில் தடுப்புகள் அமைக்கப்பட்டது.

வெளியூர் சென்று திரும்பிய வேல ராமமூர்த்தி குடும்பத்தினர் இதனை கண்டு ஆத்திரம் அடைந்தனர். தடுப்புக்கட்டைகளில் அடிப்பகுதியில் உள்ள கட்டையை மட்டும் அகற்றும்படி தெரிவித்த நிலையில், உயர் அதிகாரியிடம் கேட்டுச்சொல்வதாக தெரிவித்த ஊழியர்கள் அதனை அகற்ற நடவடிக்கை மேற்கொள்ள வில்லை. இதையடுது வேலராமமூர்த்தியின் மனைவி கையில் அரிவாளை எடுத்து வந்து, கம்புகள் கட்டப்பட்டிருந்த கயிற்றை வெட்டியதால் ஊழியருடன் வாக்குவாதம் ஏற்பட்டது

தகவல் அறிந்து வந்த காவல்துறையினர் இப்படி செய்தால் கைது செய்ய வேண்டி இருக்கும் என்று எச்சரித்த நிலையில், வீட்டு தேவையான காய்கறி வாங்கனும், வீட்டுக்கு பேரபிள்ளைங்க வருவாங்க, இப்படி இருந்தால் எப்படி வர முடியும் , மாலை 6 மணிக்கே மேல கட்டுங்க என்று தெரிவித்தார்

அந்த தடுப்புக்கட்டையை அகற்ற ஒப்புக் கொள்ளாத நிலையில், பை.. கொடுங்க, காய்கறி வாங்கித்தருகிறோம் என்று போலீசார் தெரிவித்த நிலையில், நல்ல காய்கறியாக நான் பார்த்து வாங்குவது மாதிரி வருமா ? கட்டைய எடுத்து விடுங்க என்று பதிலுக்கு பதில் கூறியதால் வாக்குவாதம் முற்றியது

இதையடுத்து வீட்டிற்குள் இருந்து வெளியே வந்த நடிகர் வேலராமமூர்த்தி, தனது மனைவியை உள்ளே வருமாறு உரக்க சொன்னதால், அடுத்த நொடியே பிரச்சனை முடிவுக்கு வந்தது. அதனை தொடர்ந்து அந்த தடுப்பு கட்டையின் இடைவெளி வழியாக மாடுகள் உள்ளே நுழைந்து விடாதபடி கம்பிகளை கொண்டு முழுமையாக அடைக்கப்பட்டது.