மதுரை மாவட்டம் திருமங்கலம் அருகே ஊராட்சி வார்டு உறுப்பினராக வெற்றி பெற்றவரின் கணவர் மற்றும் உறவினர்கள் மீது 15 பேர் கும்பல் நடத்திய தாக்குதலில் அவர்கள் படுகாயம் அடைந்தனர்.

திருமங்கலத்தை அடுத்த மையிட்டான்பட்டி ஊராட்சியில் வார்டு உறுப்பினர் தேர்தலில் பாண்டியம்மாள் என்பவர் வெற்றி பெற்றார். இந்நிலையில் நேற்று இரவு அவரது வீட்டுக்கு 3 கார்களில் வந்த 15 பேர் கும்பல் வீட்டுக்கு வெளியில் அமர்ந்திருந்த பாண்டியம்மாளின் கணவர் ஞானசேகரன், உறவினர்கள் ஆறுமுகம், சேகர் ஆகியோரை அரிவாள் மற்றும் கம்புகளால் சரமாரியாக தாக்கியதாகக் கூறப்படுகிறது. இதில் படுகாயம் அடைந்த 3 பேரும் மதுரை ராஜாஜி மருத்துவமனையில் அனுமதிக்கப்பட்டுள்ளனர்.

சம்பவம் குறித்து கள்ளிக்குடி போலீசார் விசாரணை மேற்கொண்டுள்ளனர்.