ஆங்கிலப் புத்தாண்டையொட்டி கோவில்களில் சிறப்பு வழிபாடுகள் நடைபெற்றன. அதிகாலையிலேயே ஏராளமானோர் கோவில்களுக்கு குடும்பத்தினருடன் வந்து வழிபட்டனர்.
திருச்செந்தூர் சுப்பிரமணிய சுவாமி கோவிலில் புத்தாண்டை முன்னிட்டு அதிகாலை ஒரு மணிக்கு கோவில் நடை திறக்கப்பட்டது. அதனை தொடர்ந்து விஸ்வரூப தீபாராதனையும், உதயமார்த்தாண்ட அபிஷேகமும் நடைபெற்றது.
புத்தாண்டை முன்னிட்டு ஏராளமான பக்தர்கள் அதிகாலை முதலே கடலில் புனித நீராடி நீண்ட வரிசையில் காத்திருந்து ஸ்வாமி தரிசனம் செய்தனர்.
திருத்தணி முருகன்கோவில் முழுவதும் வண்ண விளக்குகளால் அலங்கரிக்கப்பட்டு இருந்தது.நள்ளிரவு 12 மணிக்கு அபிஷேகம் செய்யப்பட்டு, சிறப்பு அலங்காரத்துடன் இருந்த மூலவருக்கு தீபாரதனையும் காட்டப்பட்டது. பக்தர்கள் விடிய விடிய மலைக் கோயில் மாட வீதிகளில் காத்திருந்து முருகப்பெருமானை வழிபட்டனர்.
விழுப்புரம் மாவட்டம் திருவக்கரை, மலையனூர் உள்ளிட்ட கோவில்களில் நள்ளிரவில் சிறப்பு பூஜை நடைபெற்றது.
திருப்பதி ஏழுமலையான் கோவிலில் யுகாதி எனப்படும் தெலுங்கு புத்தாண்டுக்கே முன்னுரிமை அளிக்க வேண்டுமென ஆந்திர அரசு உத்தரவிட்டிருந்ததால், சிறப்பு பூஜைகள் நடைபெறவில்லை. இருப்பினும் திரளான பக்தர்கள் பங்கேற்று ஏழுமலையானை தரிசித்து சென்றனர்.
சென்னை திருப்பதி தேவஸ்தான தகவல் மையத்தில் புத்தாண்டையொட்டி அதிகாலையில் சிறப்பு பூஜைகள் நடைபெற்றது. ஏராளமான பொதுமக்கள் குடும்பத்துடன் வந்திருந்து நீண்ட வரிசையில் நின்று ஏழுமலையானை வழிபட்டனர்.
கோவை புளியகுளம் பகுதியிலுள்ள விநாயகர் கோவிலில் திரளான பக்தர்கள் புத்தாண்டை முன்னிட்டு சுவாமி தரிசனம் செய்தனர்.
விருதுநகர் மாவட்டம் பந்தல்குடி ஸ்ரீசீரடி சாய்பாபா திருக்கோவிலில் உலக நன்மை வேண்டி கூட்டுப்பிரார்த்தனை நடைபெற்றது. சிவனடியார்கள் சங்கு முழக்கத்துடன் சாய்பாபாவிற்கு தீபதூப ஆராதனை செய்து வழிபட்டனர்.
சென்னை ஐயப்பன்தாங்கலில் உள்ள ஓம் காளி ஆலயத்தில் புத்தாண்டை முன்னிட்டு அம்மனுக்கு ரூபாய் நோட்டுகளால் அலங்காரம் செய்யப்பட்டிருந்ததை பக்தர்கள் கண்டு தரிசித்தனர்.
