சென்னையில் டைடல் பார்க் சிக்னல் அருகே தினந்தோறும் ஏற்படும் போக்குவரத்து நெரிசலை குறைக்கும் விதமாக கட்டப்பட்ட புதிய யூ - டர்ன் மேம்பாலம் அடுத்த மாதம் முதல் பயன்பாட்டிற்கு வர உள்ளதாக தகவல் வெளியாகி உள்ளது.
புதிய யூ - டர்ன் மேம்பாலம் மூலம் ஈசிஆர் - திருவான்மியூர் வழியாக வரும் வாகன ஓட்டிகள் வலது புறம் திரும்பி மத்திய கைலாஷ் செல்வதற்கு பதிலாக இனி இடது புறம் திரும்பி புதிய யூ - டர்ன் மேம்பாலத்தில் ஏறி மத்திய கைலாஷ் சந்திப்பு நோக்கி செல்லலாம்.
அதே போன்று ஓஎம்ஆர் சாலையில் இருந்து வந்து வலது புறம் திரும்பி திருவான்மியூர், ஈசிஆர் செல்ல வேண்டிய வாகனங்கள் இந்திரா நகர் பகுதியில் கடந்த ஆண்டு திறக்கப்பட்ட யூ - டர்ன் மேம்பாலத்தை பயன்படுத்திக்கொள்ளலாம்.
இது பயன்பாட்டிற்கு வந்த உடன், டைடல் பார்க் சந்திப்பில் சிக்னலுக்கு ஓய்வு கொடுத்து இருவழி பாதையாக மாற்ற முடிவு செய்துள்ளதாக போக்குவரத்து போலீசார் தெரிவித்துள்ளனர்.
