தூத்துக்குடி மாவட்டம் ஸ்ரீவைகுண்டம் அணைக்கட்டுப் பகுதியில் உள்ள 25-க்கும் மேற்பட்ட குளங்கள் மற்றும் சடையனேரி வாய்க்காலில் பல்வேறு இடங்களில் ஏற்பட்ட உடைப்புகளால் அவை தண்ணீர் இல்லாமல் காட்சியளிக்கின்றன.

ஸ்ரீவைகுண்டம் தடுப்பணைகளில் இருந்து வினாடிக்கு ஒரு லட்சம் கனஅடிக்கு மேல் தண்ணீர் வெளியேற்றப்பட்டதால், ஏரல் பகுதியில் குடியிருப்பு மற்றும் விவசாய நிலங்களில் வெள்ள நீர் சூழ்ந்தது.

சாத்தான்குளம் பகுதியில் உள்ள 89 குளங்களில் புத்தன்தருவை, வைரவம்தருவை போன்ற ஒருசில குளங்களில் மட்டுமே ஓரளவு தண்ணீர் உள்ளதாகவும், மற்றவற்றில் உடைப்பு காரணமாக தண்ணீர்  இல்லாமல் காணப்படுவதாகவும் விவசாயிகள் தெரிவித்துள்ளனர்.

அணைக்கட்டுக்கு மேல்பகுதியில் உள்ள 25க்கும் மேற்பட்ட பெரிய குளங்கள் மற்றும் சடையனேரி வாய்க்காலில் பல்வேறு உடைப்பு ஏற்பட்டு முழுமையாக தண்ணீர் இல்லாமல் காட்சியளிக்கிறது. தற்போது அந்த அணைக்கட்டுகளை சரி செய்யும் பணிகள் நடைபெறுகின்றன.

இதுதொடர்பாக பேசிய நாசரேத் மற்றும் செம்பூர் பகுதி விவசாயிகள்,  குளங்கள் முழுமையாக தூர்வாரப்படாமல் உள்ளதாகவும், கரைகளை பலப்படுத்தி அதில் கற்கள் பதிக்க வேண்டும் என்றும் கூறுகின்றனர்.

இவ்வாறு பணிகளை செய்தால் குளங்கள் உடையாமல் மிகப்பெரிய பாதிப்பு இல்லாமல் தவிர்க்கலாம் என்றும் விவசாயிகள் தெரிவித்துள்ளனர்.