சென்னை கோயம்பேடு சின்மயா நகர் பகுதியில் யார் தாதா என்ற மோதலில் வாலிபரைத் தாக்கி இருசக்கர வாகனங்களை அடித்து நொறுக்கிய 4 பேர் கைது செய்யப்பட்டனர்.
சாலிகிராமம் பகுதியைச் சேர்ந்த சிவசேனன் என்பவர் சின்மயா நகர் பகுதியில் நின்றிருந்த போது அங்கு வந்த 6 பேர் கொண்ட கும்பல் அவரைச் சராமரியாகத் தாக்கி, அருகில் இருந்த இருசக்கர வாகனங்களை அடித்து நொறுக்கினர்.
இதுகுறித்து அக்கம்பக்கத்தினர் அளித்த புகாரின் பேரில் சம்பவ இடத்திற்கு வந்த போலீசார், தாக்குதல் நடத்திய 4 பேரைக் கைது செய்தனர்.
ரவுடி கும்பல் தாக்கியதில் காயமடைந்த சிவசேனனை மருத்துவமனையில் அனுமதித்து, தப்பியோடிய மேலும் இருவரைத் தேடி வருகின்றனர். தொடர்ந்து நடந்த விசாரணையில், குறிப்பிட்ட பகுதியில் யார் தாதா என்பதில் ஏற்பட்ட மோதலில் இந்தத் தாக்குதல் நடந்தது தெரியவந்தது.
