திருப்பத்தூர் மாவட்டம் ஆம்பூர் அருகே, தோல் பதனிடும் தொழிற்சாலையின் கிடங்கில் பயங்கர தீ விபத்து ஏற்பட்டது.

எம்.வி சாமி நகர் பகுதியில் சுபான் என்பவருக்கு சொந்தமான தோல் கிடங்கில் பிற்பகலில் திடீரென சிறிய அளவில் தீப்பற்றியுள்ளது. அங்கிருந்த ஊழியர்கள் தீயை அணைத்த பிறகு, மதிய உணவு உண்பதற்காக வெளியே சென்றுவிட்டனர்.

ஆனால் தீப்பொறி அணையாமல் இருந்த நிலையில், காற்றின் வேகத்தால் மீண்டும் பரவி கிடங்கு முழுவதும் தீப்பற்றி எரிந்ததோடு, அருகில் இருந்த இரண்டு தோல் கிடங்குகளிலும் தீ பரவி கொளுந்துவிட்டு எரிந்தது.

தகவலறிந்து சம்பவ இடத்துக்கு விரைந்த தீயணைப்பு வீரர்கள், அப்பகுதியைச் சேர்ந்த இளைஞர்களின் உதவியுடன் தீயை அணைத்தனர். இந்த விபத்தில், மூன்று குடோன்களும் எரிந்து நாசமான நிலையில், தீ விபத்திற்கான காரணம் குறித்து விசாரணை நடத்தப்படுகிறது.