வாக்கி-டாக்கி வாங்கியதில் முறைகேடு....? 14 காவல் அதிகாரிகள் மீது வழக்கு...!

காவல்துறைக்கு வாக்கி டாக்கிகள் வாங்கியதில் முறைகேடு நடைபெற்றதாக எழுந்த புகார் தொடர்பாக, சென்னையில் காவல் அதிகாரிகளின் வீடுகள் உட்பட 18 இடங்களில் லஞ்ச ஒழிப்பு போலீசார் அதிரடி சோதனை நடத்தினர். முடிவில், 14 காவல் அதிகாரிகள் மீதும், 2 நிறுவனங்கள் மீதும் வழக்குப்பதிவு செய்யப்பட்டுள்ளது. 

தமிழக காவல்துறைக்கு வாக்கி டாக்கிகள் வாங்கியதில் முறைகேடுகள் நடைபெற்றிருப்பதாக குற்றச்சாட்டுகள் எழுந்தன. மோட்டோரோலா சொல்யூசன்ஸ் நிறுவனத்திற்கு 83 கோடியே 45 லட்சம் ரூபாய்க்கான ஒப்பந்தம் வழங்கப்பட்டது தொடர்பாக இந்த குற்றச்சாட்டுகள் எழுந்தன.

ஒப்பந்தம் வழங்கப்பட்டது குறித்து 11 வினாக்களை எழுப்பி அப்போதைய டிஜிபிக்கு, உள்துறை செயலர் நிரஞ்சன் மார்டி கடிதம் எழுதியிருந்தார். 2017-18 ம் ஆண்டில் காவல்துறையை நவீனமயமாக்க 47 கோடியே 56 லட்சம் ரூபாய் ஒதுக்கீடு செய்யப்பட்டதை கொண்டு 10 ஆயிரம் வாக்கி டாக்கிகள் வாங்கப்பட்டிருக்க வேண்டும் என்றும், ஆனால், அனுமதிக்கப்பட்ட தொகைக்கு மாறாக, 4000 வாக்கி டாக்கிகளை கொள்முதல் செய்ய 83 கோடியே 45 லட்சம் ரூபாய்க்கு ஒப்பந்தம் வழங்கப்பட்டுள்ளதாகவும் உயர்நீதிமன்றத்தில் வழக்கு தொடரப்பட்டு, பின்னர் தள்ளுபடி செய்யப்பட்டது.

இந்நிலையில், வாக்கி டாக்கி கொள்முதல் ஊழல் புகார் தொடர்பாக, சென்னையில் 18 இடங்களில் லஞ்ச ஒழிப்பு போலீசார் அதிரடி சோதனை நடத்தினர். வாக்கி டாக்கி ஊழல் நடைபெற்றதாகக் கூறப்படும் காலகட்டத்தில் தொழில்நுட்பப் பிரிவில் பணியாற்றிய அதிகாரிகளின் வீடுகளில் இந்த ரெய்டு நடைபெற்றது.

கீழ்ப்பாக்கத்தில் எஸ்.பி. அன்புச்செழியனின் வீடு, பட்டினப்பாக்கம் எம்ஆர்சி நகரில் ஏடிஎஸ்பிகள் உதயசங்கர், ரமேஷ் ஆகியோரின் வீடுகள் மற்றும் பட்டினபாக்கம் காவலர் குடியிருப்பிலும் சோதனை நடைபெற்றது. ஆர்.ஏ.புரம், அடையாறு, புனித தோமையார் மலை உள்ளிட்ட மொத்தம் 18 இடங்களில் இன்று காலை முதல் 10 மணி நேரம் சோதனை நடைபெற்றது. இதனைத் தொடர்ந்து, லஞ்ச ஒழிப்பு காவல்துறை வெளியிட்ட செய்திக்குறிப்பில், காவல் அதிகாரிகள் 14 பேர் மீதும், 2 தனியார் நிறுவனங்கள் மீதும், வழக்குப்பதிவு செய்யப்பட்டிருப்பதாகவும், முக்கிய ஆவணங்களும் கைப்பற்றிப்பட்டிருப்பதாகவும் கூறப்பட்டுள்ளது.