தஞ்சை பெருவுடையார் கோவில் குடமுழுக்கு : பாதுகாப்பு பணிகள் தீவிரம்

தஞ்சை பெருவுடையார் கோவில் குடமுழுக்கு விழாவையொட்டு பலத்த போலீஸ் பாதுகாப்போடு, பக்தர்களுக்கு வசதியாக பல்வேறு அடிப்படை வசதிகளும் செய்யப்பட்டுள்ளன. இந்த முன்னேற்பாடு பணிகளை தமிழக டிஜிபி திரிபாதி 2வது நாளாக நேரில் ஆய்வு செய்தார்.

பெருவுடையார் கோயில் குடமுழுக்கு விழா நாளை நடைபெறவுள்ளதை ஒட்டி, தஞ்சை மாநகரமே விழாக்கோலம் பூண்டுள்ளது. குடமுழுக்கிற்கு சுமார் 5 முதல் 7 லட்சம் வரை மக்கள் கூடுவார்கள் என எதிர்பார்க்கப்படும் நிலையில், வரக்கூடிய பக்தர்களுக்கு பல்வேறு அடிப்படை மற்றும் மருத்துவ வசதிகள் அரசு சார்பில் செய்யப்படுள்ளது.

கோயில் மற்றும் கோயில் சுற்றியுள்ள பகுதிகளில் சுமார் 275 தண்ணீர் தொட்டிகள் மற்றும் 238 தற்காலிக கழிப்பறைகள் ஏற்படுத்தப்பட்டுள்ளன. மருத்துவ உதவிக்காக 100 மருத்துவர்கள், 100-க்கும் மேற்பட்ட செவிலியர்கள், 6 மருத்துவக்குழுக்கள், 26 நடமாடும் மருத்துவக்குழுக்கள், 28 அவசர சிகச்சை ஊர்திகள் ஆகியவை தயார் நிலையில் வைக்கப்பட்டுள்ளன.

தீ விபத்து போன்ற சம்பவங்களை எதிர்கொள்ள, நவீன தீயனைப்பு வாகனம் மற்றும் 5 சாதாரண வாகனங்களோடு, 16 பாம்பு பிடி வீரர்களும் வரவழைக்கப்பட்டு தயார் நிலையில் உள்ளனர். உள்ளூர் மற்றும் வெளியூர்களில் இருந்து வரும் வாகனங்களை நிறுத்த 21 தற்காலிக வாகன நிறுத்துமிடங்கள் ஏற்பாடு செய்யப்பட்டுள்ளன. மாற்று திறனாளிகளின் வசதிக்காக சக்கர நாற்காலிகள் வைக்கப்பட்டுள்ளன.

இவை தவிர கோயிலினுள் நடைபெறும் நிகழ்ச்சிகளை வெளியில் இருந்து காணும் வகையில் எல்.ஈ.டி. திரைகளும் ஆங்காங்கே அமைக்கப்பட்டுள்ளது. கோயில் உள்பகுதி மற்றும் வெளியில் ஏற்கனவே பொருத்தியிருந்த சி.சி.டி.வி. கேமிராக்களோடு கூடுதலாக 8 அதி நவீன கேமிராக்கள் உள்பட 192 சி.சி.டி.வி. கேமிராக்கள் பொருத்தப்பட்டுள்ளன. அதில் பதிவாகும் காட்சிகளை கண்காணிக்க தனியாக கட்டுபாட்டு அறையை அமைத்து காவலர்கள் கண்காணித்து வருகிறார்கள்.

குடமுழுக்கு விழா பாதுகாப்பு ஏற்பாடுகளுக்காக சுமார் 5500 போலீசார் பாதுகாப்பு பணியில் ஈடுபடுத்தப்பட்டுள்ளனர். நகருக்குள் வரும் முக்கிய சாலைகளில் 12 இடங்களில் தற்காலிக சோதனை சாவடிகள் அமைத்து வாகனங்கள் சோதனை செய்யப்படுகின்றன. இந்த பாதுகாப்பு ஏற்பாடுகளை சட்டம் ஒழுங்கு டி.ஜி.பி. திரிபாதி மற்றும் காவல் அதிகாரிகள் நேரில் ஆய்வு மேற்கொண்டனர்.