ஒன்றிய தலைவர் தேர்தல் அரிவாள் வெட்டு - தீக்குளிப்பு முயற்சி

ஊரக உள்ளாட்சி மறைமுக தேர்தலின்போது தீக்குளிப்பு முயற்சி, அரிவாள் வெட்டு, மோதல் - தடியடி உள்ளிட்ட சம்பவங்கள் நடைபெற்றன.

விருதுநகர் மாவட்டம் வத்திராயிருப்பில் ஒன்றியத்தில் மொத்தம் உள்ள 13 கவுன்சிலர்களில் அதிமுக, திமுகவுக்கு தலா 6 கவுன்சிலர்கள் என சமமாக உள்ளது. ஒருவர் சுயேட்சை ஆவார். இன்று தலைவர் தேர்தலின் போது சுயேட்சை ஆதரவுடன், திமுக வைச்சேர்ந்த கண்ணன் 7 வாக்குகள் பெற்றதாக அதிகாரிகள் தெரிவித்தனர்.

முடிவு அறிவிக்க இருந்த நேரத்தில், அதிமுக கவுன்சிலர்கள் அதை ஏற்க மறுத்தனர். முடிவு அறிவிப்பை நிறுத்தி வைத்து, மறுதேர்தல் நடத்த வேண்டும் என்று வலியுறுத்தினர். இதனை அதிகாரிகள் ஏற்க மறுத்ததால் அதிமுக கவுன்சிலர்கள் அலுவலகத்தில் இருந்த மேஜை, நாற்காலி, கம்ப்யூட்டர் உள்ளிட்டவற்றை தூக்கி வீசி, அடித்து நொறுக்கி சேதப்படுத்தினர்.

இதைத்தடுக்க முயன்ற போலீசார் சிலர் தாக்கப்பட்டதுடன், செய்தி சேகரித்துக் கொண்டிருந்த செய்தியாளர் கார்த்திக்கும் தாக்கப்பட்டார். தகவல் அறிந்து கூடுதல் போலீசார் விரைந்து வந்து அலுவலகத்தில் இருந்த கவுன்சிலர்கள், அதிகாரிகளை வெளியேற்றி பாதுகாப்பு பணியில் ஈடுபட்டனர்.

 மதுரை மேற்கு ஒன்றிய 5 வது வார்டு அதிமுக கவுன்சிலரான செல்லபாண்டியன், தேர்தலுக்கு சற்று நேரத்துக்கு முன்பு ஒன்றிய அலுவலகத்திற்கு மண்ணெண்ணை கேனுடன் வந்தார். 12 வது வார்டு அதிமுக கவுன்சிலர் செந்தில்குமார் கடத்தப்பட்டதால் தேர்தலை ஒத்திவைக்க வேண்டும் என்று கூறியவாறு உடலில் மண்ணெண்ணையை ஊற்றி தீக்குளிக்க முன்றார். உடனே அங்கிருந்த போலீசார் அவரது உடலில் தண்ணீரை ஊற்றி மீட்டு அழைத்துச்சென்றனர்.

விருதுநகர் மாவட்டம் நரிக்குடி ஒன்றிய தலைவர் தேர்தலின் போது ஏற்பட்ட மோதலில் போலீஸ் துணை சூப்பிரண்டுக்கு அரிவாள் வெட்டு விழுந்தது. இங்கு 14 கவுன்சிலர்களில் அதிமுக மற்றும் திமுக வின் பலம் சம அளவில் இருப்பதால் குலுக்கல் முறையில் தலைவரை தேர்வு செய்ய அதிகாரிகள் பேச்சு வார்த்தை நடத்தினர். அப்போது இரு தரப்பினருக்கும் வாக்குவாதம் ஏற்பட்டு மோதலில் ஈடுபட்டனர். அப்போது சிலர் ஒன்றிய அலுவலகத்தில் இருந்த பொருட்களை அடித்து நொறுக்கி சேதப்படுத்தினர்.

தகவல் கிடைத்ததும் அருப்புக்கோட்டை டிஎஸ்பி வெங்கடேஷ் தலைமையில் போலீசார் சென்று அமைதிப்படுத்த முயன்றனர். இந்நிலையில் வெளியில் இருந்து வந்த சிலர் சரமாரியாக கல்வீசில் ஈடுபட்டனர். இதை தடுக்க முயன்ற போது டிஎஸ்பி வெங்கடேஷை அரிவாளால் வெட்டிவிட்டு தப்பி ஓடினர். இதையடுத்து கூடுதலாக போலீசார் வரவழைக்கப்பட்டு அங்கிருந்தவர்களை வெளியேற்றி ஒன்றிய அலுவலகத்தை தங்கள் கட்டுப்பாட்டில் கொண்டு வந்தனர்.

இதற்கிடையே டிஎஸ்பி யை வெட்டியதாக இருவரை போலீசார் கைது செய்துள்ளனர். மேலும் சிசிடிவி காட்சியை வைத்து மோதலில் ஈடுபட்டவர்களை தேடிவருகின்றனர்.

ராமநாதபுரம் மாவட்டம் போகலூர் ஊராட்சி ஒன்றியத்தில் 4 தி.மு.க. உறுப்பினர்களும் 4 சுயேச்சை உறுப்பினர்களும் வெற்றி பெற்றுள்ளனர். ஊராட்சி ஒன்றியத் தலைவருக்கான மறைமுகத் தேர்தலில் தி.மு.க.வைச் சேர்ந்த சத்யா குணசேகரனும், சுயேச்சை உறுப்பினரான முனியசாமியும் போட்டியிட்டனர்.

இந்நிலையில் வெற்றி பெறும் விவகாரத்தில் தி.மு.க. உறுப்பினர்களுக்கும், சுயேச்சை உறுப்பினர்களுக்கும் வாக்குவாதம் ஏற்பட்டதைத் தொடர்ந்து தி.மு.க.வினர் வாக்குச்சீட்டுகளில் மையை ஊற்றினர். இதையடுத்து மாவட்ட ஆட்சியரின் உத்தரவின் பேரில் தேர்தல் நிறுத்தப்பட்டது. பின்னர் சிறிது நேரம் கழித்து மீண்டும் தேர்தல் நடத்தப்பட்ட நிலையில் மை ஊற்றப்பட்டதற்கு எதிர்ப்பு தெரிவித்து சுயேச்சை உறுப்பினர் ஒருவர் வெளிநடப்புச் செய்தார்.

பின்னர் நடைபெற்ற தேர்தலில் 4 வாக்குகள் பெற்று தி.மு.க. உறுப்பினர் வெற்றி பெற்றார். இந்நிலையில் தி.மு.க. வெற்றிபெற்றதாக அறிவிக்கப்பட்டதற்கு எதிர்ப்பு தெரிவித்து அ.தி.மு.க.வினரும், அவர்களது ஆதரவு பெற்ற சுயேச்சை வேட்பாளர்களும் மதுரை ராமநாதபுரம் தேசிய நெடுஞ்சாலையில் மறியலில் ஈடுபட்டனர்.

திருவண்ணாமலை மாவட்டம் கலசப்பாக்கம் ஒன்றியத்தில் மொத்தம் உள்ள 21 இடங்களில் திமுகவின் பலம் 9 ஆகவும், அதிமுகவின் பலம் 8 ஆகவும் உள்ளது. மேலும் பா.ம.க, மற்றும் சுயேச்சை வேட்பாளர்கள் தலா 2 இடங்களில் வெற்றி பெற்று இருந்தனர்.

இந்நிலையில் தலைவர் தேர்தலில், 13 வாக்குகள் பெற்று, திமுகவைச் சேர்ந்த அன்பரசி வெற்றி பெற்றதாக அறிவிக்கப்பட்டது. இதில் அதிகாரிகள் ஒருதலைபட்சமாக செயல்பட்டதாக அதிமுகவினர் எதிர்ப்பு தெரிவித்ததால், திமுக மற்றும் அதிமுகவினர் நாற்காலிகளை வீசி ரகளையில் ஈடுபட்டனர்.