ஒன்பது வாக்குச் சாவடிகளில் இன்று மறுவாக்குப் பதிவு நடைபெற்று வருகிறது

Jan 01, 2020 10:24:00 AM 0 662

ஊரக உள்ளாட்சித் தேர்தலில் ஒன்பது வாக்குச் சாவடிகளில் இன்று மறுவாக்குப் பதிவு நடைபெற்று வருகிறது.

திருச்செந்தூர்

திருச்செந்தூரை அடுத்த ஆழ்வார்திருநகரி ஒன்றியம் நாலுமாவடி ஊராட்சி மன்ற தலைவர் பதவிக்கு கடந்த 27-ஆம் தேதி நடைபெற்ற தேர்தலில் 6 வேட்பாளர்கள் போட்டியிட்ட நிலையில் வாக்குச்சீட்டில் ஒன்பது சின்னங்கள் இடம்பெற்றன. இதையடுத்து நாலுமாவடி ஊராட்சிக்கு உட்பட்ட 5 வாக்குச் சாவடிகளிலும் இன்று மறுவாக்குப் பதிவு நடைபெற்று வருகிறது.

தேனி

தேனி மாவட்டம் போடி ஊராட்சி ஒன்றியத்திற்கு உட்பட்ட உப்புக்கோட்டை கிராமத்தில் கடந்த 30-ஆம் தேதி 8-வது வார்டு உறுப்பினருக்கான தேர்தலில் போட்டியிட்ட நான்கு பேரில் ஒருவரான ராசுவின் சின்னமும் பெயரும் வாக்குச் சீட்டில் விடுபட்டதால் மறுவாக்குப் பதிவு இன்று காலை 7 மணிக்கு தொடங்கி நடைபெற்று வருகிறது. ஏற்கனவே வாக்காளர்களின் ஆட்காட்டி விரவில் மை இருப்பதால் நடு விரலில் மை வைக்கப்பட்டு வாக்கு பதிவு நடைபெறுகிறது. 30க்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர்

கடலூர்

கடலூர் ஊராட்சி ஒன்றியத்திற்குட்பட்ட விலங்கல்பட்டு ஊராட்சியில் 4-வது வார்டு உறுப்பினர் பதவிக்கு கடந்த 27-ஆம் தேதி நடைபெற்ற தேர்தலில் மோகனா என்ற வேட்பாளரின் கார் சின்னம் வாக்குச் சீட்டில் விடுபட்டது. இதையடுத்து அங்கு வாக்குப்பதிவு ரத்து செய்யப்பட்டு இன்று மறுவாக்குப் பதிவு நடைபெற்று வருகிறது. 50க்கும் மேற்பட்ட போலீசார் பாதுகாப்புப் பணியில் ஈடுபட்டுள்ளனர்.