வேளச்சேரி பி.வி.ஆர் திரையரங்கில் good bad ugly படம் பார்க்க சென்ற ரசிகர்கள் , உற்சாக மிகுதியால் இருக்கை மீது ஏறி ஆட்டம் போட்டதால் இருக்கை சேதம் அடைந்ததாகவும், அடுத்த ஷோவுக்கு குடும்பத்துடன் படம் பார்க்க வந்தவர்கள் இருக்கையில் அமர இயலாமல் திரையரங்கு நிர்வாகத்திடம் வாக்குவாதம் செய்ததால் பரபரப்பு ஏற்பட்டது

குட் பேட் அக்லி... ரசிகர்களின் உற்சாகத்தால் திரையரங்கில் இருக்கைகள் சேதமானதால் அடுத்த காட்சிக்கு படம் பார்க்க சென்ற குடும்பத்தினர் பி.வி.ஆர் திரையரங்க ஊழியர்களுடன் வாக்குவாதம் செய்த காட்சிகள் தான் இவை..!

அஜீத்தின் குட் பேட் அக்லி படத்தை அஜீத் ரசிகர்கள் குடும்பம் குடும்பமாய் கொண்டாடி வரும் நிலையில், 3 நாட்களில் அந்த படத்தின் வசூல் 100 கோடியை தாண்டி இருப்பதாக தகவல் வெளியாகி உள்ளது. இந்த நிலையில் பிளாக்பஸ்டர் சம்பவம் என்று சக்சஸ் பார்ட்டி வைத்த படத்தயாரிப்பு நிறுவனமான மைத்திரி மூவி மேக்கர்ஸ் தயாரிப்பாளர், குட் பேட் அக்லி ஒரு 2 மணி நேர ரோலர்ஸ்கோட்டர் என்று புகழ்ந்துள்ளார்

தமிழ் புத்தாண்டு விடுமுறை என்பதால் திரையரங்குகளில் இந்த படத்தை காண கூட்டம் அலைமோதியது. பலர் தங்கள் இருக்கைகளை முன்கூட்டியே முன்பதிவு செய்து திரையரங்கிற்கு வந்து படம் பார்த்து சென்றனர்

படம் குதுகலமாக இருப்பதால் ரசிகர்கள் உற்சாக மிகுதியால் இருக்கைகள் மீது ஏறி நின்று ஆடி அலப்பறை செய்வதாகவும், சில திரையரங்குகளில் இருக்கைகள் சேதம் அடைவதாகவும் கூறப்படுகின்றது. இந்த நிலையில் தனியார் நிறுவன ஊழியர் ஒருவர், வேளச்சேரியில் உள்ள மாலில் உள்ள பி.வி.ஆர் திரையரங்கில் தனது குடும்பத்தினர் 8 பேருக்கு முன்பதிவு செய்து குட் பேட் அக்லி படம் பார்க்க சென்றார். அவர் முன்பதிவு செய்த இருக்கைகளில் ஒன்று அமர இயலாத வகையில் சேதம் அடைந்திருந்ததாக கூறப்படுகின்றது. இது குறித்து கேட்டதற்கு பி.வி.ஆர் ஊழியர்கள் முறையான பதில் சொல்லாமல் காத்திருக்க வைத்ததால் வாக்குவாதம் ஏற்பட்டது

படம் தொடங்குவதற்கு முன்பாக மாற்று இருக்கை கேட்ட நிலையில் , இப்போதைக்கு முடியாது என்றும் தாங்கள் சொல்லும் வேறு தினத்தில் வந்து படத்தை பார்த்துசெல்லுங்கள் என்று கூறியதால் ஊழியர்களுடன் வாக்குவாதம் உண்டானது

தங்களுக்கு முறையான பதில் தராத ஊழியர்களை படம் பிடித்ததால் , அவர்கள் செல்போனை பறிக்க முயன்றதால் தள்ளு முள்ளு ஏற்பட்டது.


இதையடுத்து அந்த இருக்கைக்கு உரிய பணத்தை திரும்ப தந்து விடுவதாக ஊழியர்கள் ஒப்புக் கொண்டனர். தங்கள் குழந்தைகளை ஏமாற்ற விரும்பாத பெற்றோர், அவர்கள் 4 பேரை மட்டும் படம் பார்க்க வைத்து விட்டு மற்றவர்கள் திரையரங்கிற்கு வெளியில் காத்திருக்கும் சூழல் ஏற்பட்டது.

திரையரங்கிற்கு படம் பார்க்க வரும் ரசிகர்கள் அடுத்த ஷோ பார்க்கவரும் ரசிகர்களின் நலன் கருதி இருக்கைகள் மீது ஏறி ஆடுவதை தவிர்க்க வேண்டும் என்று திரையரங்க நிர்வாகத்தினர் கோரிக்கை விடுத்துள்ளனர்.