வான்கடே மைதானத்தில், நேற்று மும்பை - பெங்களூரு அணிகள் மோதின. டாஸ் வென்ற மும்பை அணி முதலில் பவுலிங் தேர்வு செய்தது.

பெங்களூரு அணியின் துவக்க வீரர் சால்ட் முதல் பந்தில் பவுண்டரி அடித்து, 2வது பந்திலேயே Boult பந்துவீச்சில் Bowled ஆகி வெளியேறினார்.

பின்னர் கோலியுடன் கைகோர்த்த தேவ்தத் படிக்கல், அதிரடியாக விளையாடி ரன்களை குவிக்க, படிக்கல் 22 பந்துகளில் 37 ரன்கள் எடுத்து வெளியேறினார்.

கோலியும் 42 பந்துகளில் 67 ரன்கள் எடுத்து வெளியேற, இறுதிக்கட்டத்தில், ஜித்தேஷ் ஷர்மாவின் அதிரடியால் பெங்களூரு அணி நிர்ணயிக்கப்பட்ட 20 ஓவர்களில் 5 விக்கெட்டுகள் இழந்து 221 ரன்கள் எடுத்து இருந்தனர்.

222 ரன்கள் எடுத்தால் வெற்றி என்ற இலக்குடன் களமிறங்கிய மும்பை அணி, ரோகித் 17 ரன்கள் (9 பந்துகளில்), ரயன் ரிக்கல்டன் 17 ரன்கள் (10 பந்துகளில் ), வில் ஜாக்ஸ் 22 ரன்கள் (18 பந்துகளில்) எடுத்து அடுத்தடுத்து விக்கெட்டுகளை இழந்து வெளியேறினர்.

சூர்யகுமார் யாதவும், 28 ரன்கள் (26 பந்துகளில்) எடுத்து ஆட்டமிழந்து வெளியேற, மும்பை அணி வீரர்கள் தோல்வி சோகத்தில் ஆழ்ந்தனர்.

ஆனால், இனி தான் இந்த மும்பை அணியோட ஆட்டத்த பாக்க போறீங்க என்பது போல, சிக்சர்கள், பவுண்டரி என பறக்க விட்டு, ஆட்டம் இன்னும் முடியல என்பது போல சோர்ந்து இருந்த மும்பை அணி ரசிகர்களுக்கு உற்சாகத்தை கொடுத்தனர், ஹர்திக், திலக் ஜோடி.

கடந்த போட்டியில், பவுண்டரிகள் அடிக்க கஷ்டப்பட்ட திலக், Retired out ஆகி வெளியேறினார். அவர் Retired out ஆனது பெரும் பேசுபொருளான நிலையில், நேற்றைய போட்டியில் அவர் comeback கொடுத்தார்.

அதிரடியாக விளையாடி 29 பந்துகளில் 56 ரன்கள் குவித்த அவர், புவனேஸ்வர் பந்துவீச்சில் அவுட்டாகி வெளியேறினார்.

15 பந்துகளில் 42 ரன்கள் எடுத்து பட படவென பட்டாசாய் வெடித்த ஹர்திக் பாண்டியா, மும்பை அணியை வெற்றியின் விளிம்பிற்கு அழைத்து சென்றார்.

ஆனால், 18.1ஆவது ஓவரில் ஹேசல்வுட் பந்துவீச்சில், லியம் லிவ்விங்ஸ்டனிடம் கேட்ச் கொடுத்து அவுட்டானார்.

பின்னர் வந்த சாண்ட்னர் மற்றும் தீபக் சஹர் 8 மற்றும் 0 ரன்களில் முறையே வெளியேற, மும்பை அணி 20 ஓவர்கள் முடிவில் 9 விக்கெட்டுகள் இழந்து 209 ரன்கள் எடுத்தது. பெங்களூரு அணி 12 ரன்கள் வித்தியாசத்தில் வெற்றி பெற்றது.

இந்த நிலையில், பெங்களூரு அணியின் கேப்டன் ரஜத் பட்டிதாருக்கு Slow over rate-ற்காக அபராதம் விதிக்கப்பட்டுள்ளது. 12 லட்சம் அபராதம் அவருக்கு விதிக்கப்பட்டுள்ளது.