தன்னுடைய பாட்டுக்கு ராயல்டி வசூலித்து வரும் இசைஞானி இளையராஜாவுக்கு டெல்லி நீதிமன்றம் திடீர் தடை போட்டிருக்கின்றது. பட்டி தொட்டியெல்லாம் பிரபலமான “என் இனிய பொன் நிலாவே...” பாடலால் இளையராஜாவுக்கு செக் வைக்கப்பட்ட பின்னணி குறித்து விவரிக்கின்றது இந்த செய்தித்தொகுப்பு..

சிலருக்கு மது போதை என்றால்.. பல இசை பிரியர்களுக்கு இளையராஜாவின் இசையில் வெளியான 80 ஸ் பாடல்கள் இன்றும் தீராத போதையாக இருக்கின்றது.

அந்த வகையில் பாலுமகேந்திரா இயக்கத்தில் 1980 ல் வெளியான மூடு பனி படத்தில் இடம் பெற்ற, என் இனிய பொன் நிலாவே... பாடல் இன்றும் இசை பிரியர்களின் ஆல் டைம் பேவரைட்..!

இந்த பாடல் யாருக்கு சொந்தம் என்று தான் டெல்லி உயர் நீதிமன்றம் வரை பஞ்சாயத்து போயிருக்கின்றது. இந்த பாடலுக்கு இசை இளையராஜா என்பது அனைவருக்கும் தெரியும். இருந்தாலும் இந்த படத்திற்கான இசைக்காக தயாரிப்பு நிறுவனத்திடம் இளையராஜா ஊதியம் பெற்று விட்ட நிலையில், இந்த படத்தின் பாடல்களை சரீகம என்ற நிறுவனத்துக்கு தயாரிப்பு நிறுவனம் விற்று விட்டதாக கூறப்படுகின்றது.

இந்த நிலையில் தான் ஜீவா நடிக்கும் புதிய படமான அகத்தியா என்ற படத்திற்காக இதே பாடலை தனது பாணியில் மெருகேற்றி யுவன் சங்கர் ராஜா பயன்படுத்தி இருந்தார்.

இதற்கு தடை கோரி சரீகம நிறுவனம் டெல்லி உயர் நீதிமன்றத்தில் வழக்கு தொடர்ந்திருந்தது. என் இனிய பொன் நிலாவே... பாடலை இசையமைப்பாளர் இளையராஜாவின் அனுமதியுடன் தான் அகத்தியா படத்தில் யுவன் சங்கர் ராஜா பயன்படுத்தி இருப்பதாக வேல்ஸ் பிலிம்ஸ் இண்டர் நேசனல் சார்பில் நீதிமன்றத்தில் விளக்கம் அளிக்கப்பட்டது.

இளையராஜா இந்த பாடலை உருவாக்கி இருந்தாலும், இந்த பாடலுக்கான உரிமை சரீகம நிறுவனத்திடம் இருப்பதால் இந்த பாடலுக்கு இளையராஜா உரிமைகோர இயலாது என்றும் என் இனிய பொன் நிலாவே பாடலை அகத்தியா படத்தில் பயன்படுத்த தடை விதித்தும் நீதிமன்றம் உத்தரவிட்டது.

இதுவரை தான் இசை அமைத்த படங்களின் பாடல்களுக்கு ராயல்ட்டியாக மாதந்தோறும் பல லட்சங்களை சம்பாதித்து வரும் இளையராஜாவுக்கு நீதிமன்றத்தின் உத்தரவு அதிர்ச்சியை ஏற்படுத்தி உள்ளது.