பெண்ணின் குடும்பத்தை மிரட்டியவர் கை முறிந்து சிறைப்பறவை ஆனார்!
புதுச்சேரியில் இளம்பெண்ணை ஒரு தலையாகக் காதலித்த இளைஞர், தன்னைத் திருமணம் செய்துகொள்ளுமாறு தாய் மற்றும் தங்கையுடன் பெண்ணின் வீட்டுக்குச் சென்று கொலை மிரட்டல் விடுத்ததை அடுத்து கைது செய்யப்பட்டுள்ளார்.
அரை டிராயர் போட்டுக்கொண்டு காதல் வசனம் பேசும் இவர் தான் பழக்கடை பாலமுருகன் என்கிற அருண்.
புதுச்சேரி லாஸ்பேட்டை கருவடிகுப்பம் பகுதியை சேர்ந்த நிஷா என்ற பெண், ஆய்வக உதவியாளராகப் பணிபுரிந்து வந்த தனியார் பல் மருத்துவமனை உள்ள தெரு முனையில் சாலை ஓர பழக்கடை வைத்து அருண் வியாபாரம் செய்து வந்ததாக தெரிகிறது. நிஷா மருத்துவமனை செல்லும் போதும் வீடு திரும்பும் போதும் பின் தொடர்ந்து சென்றதாக கூறப்படும் அருண், ஒரு நாள் நிஷாவிடம் சென்று தாம் அவரைக் காதலிப்பதாக கூறியதாக சொல்லப்படுகிறது. இதையடுத்து அருணின் கடை அருகே உள்ள மருத்துவமனையில் வேலையை விட்டு வேறு மருத்துவமனையில் பணியில் சேர்ந்துள்ளார் நிஷா.
இதன் பிறகும் அருண் விடாமல் நிஷா புதிதாக பணிக்கு சேர்ந்த மருத்துவமனை மற்றும் அவரது வீட்டு அருகே சென்று தன்னைக் காதலிக்குமாறு வற்புறுத்தியதாக தெரிகிறது. மேலும் நிஷாவை அவருக்கு தெரியாமலே புகைப்படம் எடுத்து, தனது காதலி என்று சமூக வலைதள பக்கங்களில் பதிவு செய்ததாக கூறப்படும் அருண், நிஷாவின் பெயரை மார்பில் பச்சை குத்திக் கொண்டு தன்னை திருமணம் செய்தே ஆக வேண்டும் எனகட்டாயப்படுத்தியதாக தெரிகிறது.
இவற்றின் தொடர்ச்சியாக வெள்ளியன்று காலை அருண் தனது தாய் சித்ரா மற்றும் தங்கை பரமேஸ்வரியுடன் நிஷா வீட்டிற்கு சென்று, நிஷா தன்னை திருமண செய்யாவிட்டால் குடும்பத்தையே கொன்றுவிடுவேன் என மிரட்டியதாக கூறப்படுகிறது. நிஷாவை கடத்திச் சென்று அருணுக்குத் திருமணம் செய்து வைத்துவிடுவோம் என அருணின் தாயும் தங்கையும் மிரட்டியதாக லாஸ்பேட்டை காவல் நிலையத்தில் நிஷா புகார் அளித்தார். இதன்பேரில் வழக்கு பதிவு செய்த போலீசார் அருணை தேடிச் சென்ற போது, போலீசாருடன் அவர் வாக்குவாதத்தில் ஈடுபட்டதாகவும், அவர்களுடன் தள்ளு முள்ளில் ஈடுபட்டதாகவும் கூறிய போலீசார், அருகே இருந்த வாய்க்காலில் நிலை தடுமாறி விழுந்த அருணின் கையில் எலும்பு முறிவு ஏற்பட்டதாகக் கூறி மாவுக்கட்டு போடடுள்ளனர். பின்னர் அருணை கைது செய்த போலீசார், தலைமறைவாக உள்ள அவரது தாய் மற்றும் தங்கையை தேடி வருகின்றனர்.
RELATED POSTS
Comments