12ஆம் வகுப்பு பொதுத்தேர்வு முடிவுகள்.. 94.03 சதவீதம் பேர் தேர்ச்சி!

தமிழ்நாட்டில், கடந்த மார்ச் மாதம் நடைபெற்ற பனிரெண்டாம் வகுப்பு தேர்வு முடிவுகள் வெளியாகியுள்ள நிலையில், 98.85 விழுக்காடு தேர்ச்சியுடன் விருதுநகர் மாவட்டம் முதலிடம் பிடித்துள்ளது.

தமிழகத்தில் கடந்த மார்ச் மாதம் நடைபெற்ற 12ஆம் வகுப்பு பொதுத்தேர்வை 8 லட்சம் மாணவர்கள் எழுதினர். தேர்வு முடிவுகள் மே 8ஆம் தேதி வெளியாகும் என அறிவிக்கப்பட்டபடி காலை 10 மணியளவில் அமைசர் அன்பில் மகேஷ் பொய்யாமொழி வெளியிட்டார்.

தமிழக அரசின் அங்கீகரிக்கப்பட்ட இணையதளத்தில் தேர்வு முடிவுகள் வெளியான நிலையில், மாணவர்கள், தனித்தேர்வர்களின் பதிவு செய்யப்பட்ட மொபைல் எண்ணிற்கும் தேர்வு முடிவுகள் அனுப்பி வைக்கப்பட்டன.

+2 தேர்வை 8 லட்சத்து 03 ஆயிரத்து 385 பேர் எழுதிய நிலையில், 7 லட்சத்து 55 ஆயிரத்து 451 மாணவ, மாணவிகள் தேர்ச்சி பெற்றுள்ளனர். வழக்கம்போல் இந்த ஆண்டும் மாணவர்களை விட மாணவிகளே அதிகளவில் தேர்ச்சி பெற்றுள்ளனர்.

அதன்படி மாணவர்கள் 91.45 விழுக்காட்டினரும் மாணவியர் 96.38 விழுக்காட்டினரும் தேர்ச்சி பெற்றுள்ளனர். 12ஆம் வகுப்பு தேர்ச்சி விகிதத்தில் 97.85 விழுக்காடு தேர்ச்சியுடன் விருதுநகர் மாவட்டம் முதலிடம் பிடித்துள்ளது.

97.79 விழுக்காடு தேர்ச்சியுடன் திருப்பூர் மாவட்டம் 2ஆம் இடத்தையும் 97.59 விழுக்காடு தேர்ச்சியுடன் பெரம்பலூர் மாவட்டம் 3ஆம் இடத்தையும் பிடித்துள்ளன. 87.30 விழுக்காடு தேர்ச்சியுடன் இராணிப்பேட்டை மாவட்டம் கடைசி இடத்தில் உள்ளது.

12ஆம் வகுப்பு பொதுத்தேர்வில், 326 அரசு பள்ளிகள் 100 விழுக்காடு தேர்ச்சியை எட்டியுள்ளன. கடந்த ஆண்டு தேர்ச்சி சதவிகிதம் 93.76 விழுக்காடாக இருந்த நிலையில், இந்தாண்டு 94.30 விழுக்காடாக உயர்ந்துள்ளது.

12ஆம் வகுப்பு தமிழ் மொழிப்பாடத் தேர்வில் 2 பேர் 100 விழுக்காடு மதிப்பெண்கள் பெற்றுள்ள நிலையில், ஆங்கில மொழிப்பாடத் தேர்வில் 15 பேர் 100 விழுக்காடு மதிப்பெண்கள் பெற்றுள்ளனர்.

12ஆம் வகுப்பு தேர்வு முடிவுகளை வெளியிட்ட பள்ளிக்கல்வித்துறை அமைச்சர் அன்பில் மகேஷ் பொய்யாமொழி, தேர்ச்சி பெற்ற மாணவர்களுக்கு வாழ்த்துகளை தெரிவித்துக் கொண்டார்.

தோல்வியடைந்த மாணவர்கள் தன்னம்பிக்கையை இழக்காமல் அடுத்து வரும் தேர்வில் வெற்றியடைவதற்கான முயற்சிகளை மேற்கொள்ளுமாறும் கேட்டுக்கொண்டார். மே 19ஆம் தேதி பதினோராம் வகுப்பு தேர்வு முடிவுகளையும் 10ஆம் வகுப்பு தேர்வு முடிவுகளையும் ஒரே நேரத்தில் வெளியிட திட்டமிட்டிருப்பதாகவும் அமைச்சர் கூறினார்.