முன்விரோதம் காரணமாக டிரைவரின் மனைவியை காரில் கடத்திச் சென்ற 5பேர் கைது

Apr 18, 2023 06:49:28 AM 0 2492

தஞ்சையில் முன்விரோதம் காரணமாக டிரைவரின் மனைவியை காரில் கடத்திச் சென்ற பைனான்ஸ் நிறுவன உரிமையாளர் உட்பட 5பேர் கைது செய்யப்பட்டனர்.

நாஞ்சிக்கோட்டையைச் சேர்ந்த இளைஞர் ஒருவர் நெல்லையில் உள்ள ஒரு பைனான்ஸ் நிறுவனத்தில் கடந்த சில மாதங்களுக்கு முன்பு டிரைவராக வேலை பார்த்து வந்துள்ளார். இந்நிலையில் அவருக்கும், நிறுவனத்தை நடத்தி வரும் வேதகிரி என்ற வினோத்துக்கும் இடையே பிரச்சனை ஏற்பட்டதாக கூறப்படுகிறது.

இதனால் அந்த வேலையை விட்ட இளைஞர் தற்போது சென்னையில் டிரைவராக பணியாற்றி வருகிறார். இந்நிலையில் வினோத், தனது சகோதரி பிரீத்தி மற்றும் 3 பேருடன் கார் மூலம் நாஞ்சிக்கோட்டையில் உள்ள டிரைவர் வீட்டிற்கு சென்றுள்ளார். அங்கு அவர் இல்லாததால் வீட்டில் இருந்த அவரது மனைவியை வலுக்கட்டாயமாக காரில் கடத்தி சென்றுள்ளனர்.

இதுதொடர்பான புகாரின் பேரில் போலீசார் தீவிர தேடுதல் வேட்டை நடத்தி காரில் இருந்த பெண்ணை மீட்டனர். சினிமாவில் வரும் காட்சிகள் போல் பெண் கடத்தப்பட்டு 1 மணி நேரத்திலேயே கடத்தல் கும்பலை போலீசார் விரட்டி பிடித்து பத்திரமாக மீட்ட சம்பவம் தஞ்சையில் பரபரப்பை ஏற்படுத்தி உள்ளது