ரூ.3 லட்சம் வரையிலான குறுகிய கால விவசாயக் கடன்களுக்கு 1.5 சதவீதம் வட்டி மானியம் - மத்திய அரசு

Aug 18, 2022 06:06:10 AM 0 3056

மூன்று லட்சம் ரூபாய் வரையிலான குறுகிய கால விவசாயக் கடன்களுக்காக, வங்கிகளுக்கு ஒன்று புள்ளி ஐந்து சதவீத வட்டி மானியம் அளிக்க மத்திய அமைச்சரவை ஒப்புதல் அளித்துள்ளது.

பிரதமர் மோடி தலைமையில் நடைபெற்ற மத்திய அமைச்சரவைக் கூட்டத்தின் முடிவுகள் குறித்த விவரங்களை மத்திய அமைச்சர் அனுராக் தாக்கூர் வெளியிட்டார். அதன்படி, கடன் வழங்கும் நிறுவனங்கள் 7 சதவீத வட்டியில் விவசாயக் கடன்களை அளிக்க முடிந்ததால், வட்டி மானியத்துக்காக வங்கிகளுக்கு மத்திய அரசு அளித்து வந்த உதவி கடந்த 2020ம் ஆண்டு நிறுத்தப்பட்டது.

இந்நிலையில் கடந்த சில மாதங்களில் ரெப்போ விகிதங்களை ரிசர்வ் வங்கி மூன்று மடங்கு அதிகரித்தது.
இதன் காரணமாக விவசாயிகளிடம் வசூலிக்கப்படும் வட்டியை வங்கிகள் அதிகரிக்காமல் தடுக்கும் வகையில், குறுகிய கால விவசாயக் கடன் வழங்கும் அனைத்து நிதி நிறுவனங்களுக்கும் 1.5 சதவீதம் வட்டி மானியம் அளிக்க மத்திய அமைச்சரவை முடிவு செய்துள்ளது

இதனால், விவசாயிகளுக்கு வழங்கப்படும் 3 லட்சம் ரூபாய் வரையிலான குறுகிய கால கடன்களுக்கு நடப்பு நிதியாண்டிலும், அடுத்த நிதியாண்டிலும் வட்டி மானியம் அளிக்கப்படும். இதற்காக பட்ஜெட்டில் 34 ஆயிரத்து 856 கோடி ரூபாய்க்கு கூடுதலாக தேவைப்படும் என எதிர்பார்க்கப்படுகிறது

ஓட்டல்கள், உணவகங்கள், சுற்றுலா போன்ற துறைகள், அவை சார்ந்த துறைகள் கொரோனா பரவலால் பாதிக்கப்பட்டதால் அவைகளுக்கு அவசர கால கடனுதவிக்காக 50 ஆயிரம் கோடி ரூபாய் ஒதுக்க மத்திய அமைச்சரவை ஒப்புதல் அளித்துள்ளது.