தீரன் சின்னமலை நினைவுநாள் தலைவர்கள் மரியாதை.!

விடுதலைப் போராட்ட வீரர் தீரன் சின்னமலையின் 217ஆவது நினைவுநாளையொட்டி அவரது உருவச் சிலைக்குத் தமிழக ஆளுநர் ரவி, முதலமைச்சர் மு.க.ஸ்டாலின், எதிர்க்கட்சித் தலைவர் எடப்பாடி பழனிசாமி உள்ளிட்டோர் மாலை அணிவித்து மரியாதை செலுத்தினர். 

கொங்கு மண்டலத்தில் ஆங்கிலேயர் ஆதிக்கம் செலுத்துவதை விரும்பாத தீரன் சின்னமலை, ஆங்கிலேயர்களை நாட்டை விட்டு விரட்டுவதற்காகத் தொடர்ந்து போரிட்டு வெற்றிபெற்று வந்தார். சின்னமலையைப் போரில் வெல்ல முடியாது எனக் கருதிய ஆங்கிலேயர்கள் வஞ்சகமாக அவரைக் கைது செய்து சங்ககிரிக் கோட்டையில் தூக்கிலிட்டனர்.

அதன் 217ஆம் ஆண்டு நினைவுநாளையொட்டி ஈரோடு மாவட்டம் ஓடாநிலையில் உள்ள அவரது மணிமண்டபத்தில் உள்ள உருவச் சிலைக்குத் தமிழக ஆளுநர் ரவி மாலை அணிவித்து மரியாதை செலுத்தினார்.

சென்னை கிண்டியில் உள்ள தீரன் சின்னமலை உருவச் சிலைக்குத் தமிழக முதலமைச்சர் மு.க. ஸ்டாலின் மாலை அணிவித்து மரியாதை செலுத்தினார்.

தீரன் சின்னமலை உருவச் சிலைக்கு அதிமுக சார்பில் கட்சியின் இடைக்காலப் பொதுச்செயலாளரும், சட்டப்பேரவை எதிர்கட்சிச் தலைவருமான எடப்பாடி பழனிசாமி மாலை அணிவித்து மரியாதை செலுத்தினார்.

பாஜக சார்பில் சட்டமன்ற உறுப்பினர் வானதி சீனிவாசன், கரு.நாகராஜன் உள்ளிட்டோர் தீரன் சின்னமலை உருவப்படத்துக்கு மலர் தூவி மரியாதை செலுத்தினர்.

சேலம் மாவட்டம் சங்ககிரிக் கோட்டையில் தீரன் சின்னமலை தூக்கிலிடப்பட்ட இடத்தில் அவரது உருவப் படத்துக்கு அமைச்சர் கே.என்.நேரு மலர்மாலை வைத்து மரியாதை செலுத்தினார். நிகழ்ச்சியில் சேலம் மாவட்ட ஆட்சியர் கார்மேகம், நாடாளுமன்ற உறுப்பினர் சின்ராஜ், சேலம் மாநகராட்சி மேயர் ராமச்சந்திரன் உள்ளிட்டோர் கலந்து கொண்டனர்.

சங்ககிரியில் முன்னாள் அமைச்சர் தங்கமணி தலைமையில் அதிமுகவினர் தீரன் சின்னமலை உருவப்படத்துக்கு மலர்மாலை வைத்து மரியாதை செலுத்தினர். இதில் முன்னாள் சபாநாயகர் தனபால், முன்னாள் அமைச்சர்கள் அன்பழகன், செம்மலை ,சரோஜா உள்ளிட்டோர் கலந்துகொண்டனர்.

ஈரோடு மாவட்டம் அரச்சலூர் ஓடாநிலையில் உள்ள தீரன் சின்னமலை மணி மண்டபத்தில் உள்ள அவரது சிலைக்கு மாவட்ட ஆட்சியர் கிருஷ்ணன் உன்னி, காவல் கண்காணிப்பாளர் சசி மோகன், தமிழ்நாடு அரசு கேபிள் டிவி நிறுவனத் தலைவர் குறிஞ்சி சிவக்குமார் உள்ளிட்டோர் மரியாதை செலுத்தினர்.