ஊரடங்கை நீட்டிப்பது, கூடுதல் தளர்வுகள் வழங்குவது குறித்து மருத்துவ வல்லுநர் குழுவுடன் முதலமைச்சர் மு.க.ஸ்டாலின் ஆலோசனை

Jun 25, 2021 01:07:14 PM 0 5351

வரும் 28ஆம் தேதி காலையுடன் ஊரடங்கு முடிவடைய உள்ள நிலையில், ஊரடங்கை நீட்டிப்பது, கூடுதல் தளர்வுகள் வழங்குவது குறித்து மருத்துவ வல்லுநர் குழுவுடன் முதலமைச்சர் மு.க.ஸ்டாலின் ஆலோசனை நடத்தினார்.

தமிழகத்தில் கொரோனா பரவல் அதிகரித்த நிலையில் மாநிலம் முழுவதும் மே 24-ந் தேதியில் இருந்து 31-ந் தேதிவரை முழு ஊரடங்கு அமல்படுத்தப்பட்டது.

இந்த ஊரடங்கு உத்தரவு நீட்டிக்கப்பட்டு வருவதோடு, ஒவ்வொரு கட்டத்திலும் படிப்படியாக தளர்வுகள் அளிக்கப்பட்டு வருகின்றன. 5ஆவது முறையாக நீட்டிக்கப்பட்ட ஊரடங்கு, வரும் 28-ந் தேதி காலையுடன் முடிவடைகிறது.

இந்த நிலையில் 6-வது முறையாக ஊரடங்கு உத்தரவை நீட்டிப்பது தொடர்பாகவும், கூடுதலாக என்னென்ன தளர்வுகள் வழங்கலாம்? என்பது குறித்தும் தலைமைச் செயலகத்தில் முதலமைச்சர் மு.க.ஸ்டாலின் ஆலோசனை மேற்கொண்டார்.

மருத்துவ வல்லுநர்கள் பங்கேற்ற இந்த ஆலோசனைக் கூட்டத்தில், சுகாதாரத்துறை அமைச்சர், செயலர் உள்ளிட்டோரும் கலந்து கொண்டனர்.

4 மாவட்டங்களில் மட்டும் தற்போது பேருந்து போக்குவரத்து உள்ள நிலையில், மேலும் 23 மாவட்டங்களில் பேருந்துகளை இயக்க அனுமதி, சிறிய கோவில்கள், சிறிய துணிக்கடைகள், நகைக்கடைகள் திறக்க அனுமதி உள்ளிட்ட பரிந்துரைகள் வழங்கப்பட்டிருக்கலாம் என தகவல்கள் தெரிவிக்கின்றன.