இன்று சர்வதேச யோகாதினம் கடைபிடிப்பு

உலகம் முழுவதும் யோகா தினம் இன்று கொண்டாடப்படுகிறது.

உடலையும், மனதையும், உள்ளத்தையும் ஒருங்கிணைத்து, அனைத்துப் புலன்களையும் ஆளுமை கொள்வது யோகா. சோகம், கோபம், பதற்றத்துடன் கூடிய வாழ்க்கை முறையை அமைத்துக் கொண்டவர்கள் இளம்வயதிலேயே மனஅழுத்தத்துக்கு ஆளாகின்றனர்.

உடல் தளர்ச்சி, நரம்புத் தளர்ச்சி, மூச்சுத் திணறல், மூட்டு வலி போன்றவை இவர்களைத் தேடி வருகின்றன. இவற்றில் சிக்காமல் உடல் ஆரோக்கியத்தைப் போற்றிப் பாதுகாப்பதுதான் யோகா பயிற்சி.

உடலுக்கு உகந்த உணவுடன், தேவையான யோகாசனங்கள் செய்யும் போது உடல் உள் உறுப்புகளும் மனமும் வலுவடைகின்றன. ஆசனம், பிராணாயமம், தியானம் இவற்றைத் தொடர்ச்சியாக செய்வதால் உடல் உறுப்புகள் தூய்மையாகி துடிப்புடன் இயங்குகின்றன.

சீரான மூச்சுக்கும், நாடித்துடிப்புக்கும், உதவுகிறது யோகா பயிற்சி! கூடும் ரத்த அழுத்தத்தை குறைத்து, எப்போதும் புத்துணர்ச்சியை அளிக்கிறது யோகா பயிற்சி.

உடலையும், மனத்தையும் உறுதியாக்கி எதையும் தாங்கும் பக்குவத்தையும், நோய்களை நெருங்கவிடாத எதிர்ப்பு சக்தியையும் கிடைக்கச் செய்கிறது யோகா பயிற்சி. முதுமைத் தோற்றத்தை தள்ளிப்போட வைக்கிறது யோகா பயற்சி.

குறிப்பிட்ட நேரத்தை நாள்தோறும் ஒதுக்கி யோகாவை செய்து வந்தால், மனம் அழுத்தத்தில் இருந்துவிடுபட்டு புத்துணர்ச்சியுடன் இயங்க முடியும்.

தனிநபர் மட்டுமின்றி சமூக அளவில் விசாலமான பரந்த நலம் பேணும் யோகப் பயிற்சி, மதங்கள், இனங்கள், நாடுகளைக் கடந்து அனைத்து மக்களும் பின்பற்ற ஏற்றதாய் இருக்கிறது. உடல், மனம், ஆன்மாவைத் தூய்மையாக்கும் யோகா பயிற்சி ஒவ்வொருவருக்கும் அவசியம். யோகா பயிற்சி செய்வோர் முதுமை மற்றும் நோய்களில் இருந்து விடுபடுவது நிச்சயம்.