100ஆவது பிறந்தநாளை கொண்டாட இருந்த நிலையில் காலமான எடின்பெரோ கோமகன்...

இங்கிலாந்து ராணி இரண்டாம் எலிசபெத்தின் கணவரும், எடின்பெரோ கோமகனுமான இளவரசர் பிலிப் காலமானார். அவரது மறைவுக்கு உலக தலைவர்கள் அனைவரும் இரங்கல் தெரிவித்து வருகின்றனர்.

ஒருகாலத்தில் சூரியன் மறையாத தேசம் எனப் பெயர் பெற்ற இங்கிலாந்து நாட்டின் மகாராணியாக இரண்டாம் எலிசபெத் உள்ளார். இவரது கணவரும், எடின்பெரோ கோமகனுமான இளவரசர் பிலிப், தனது 99ஆவது வயதில் காலமானதாக, பிரிட்டன் அரச நிர்வாகத்தின் தலைமை பீடமான பக்கிங்காம் அரண்மனை அறிவித்துள்ளது.

கிரேக்க மற்றும் டென்மார்க் அரச குடும்பத்தின் வம்சாவளியில், கிரீஸ் நாட்டின் கோர்பூ தீவில் 1921ஆம் ஆண்டு பிறந்தார் பிலிப்.தனது 18ஆவது வயதில் பிரிட்டிஷ் ராயல் கடற்படையில் சேர்ந்த பிலிப், 1947ஆம் ஆண்டு நவம்பர் 20ஆம் தேதி, இங்கிலாந்து ராணி இரண்டாம் எலிசபெத்தை கரம் பிடித்தார். இவர்களது திருமணம் முடிந்து 6 வருடங்கள் கழித்து, 1953ஆம் ஆண்டு, பிரிட்டன் மாமன்னர் நான்காம் ஜார்ஜ் மறைவுக்குப் பின்னர், இங்கிலாந்து மகாராணியாக இரண்டாம் எலிசபெத் பட்டம் சூட்டப்பட்டார். இதனைத் தொடர்ந்து, இளவரசர் பிலிப், எடின்பெரோ கோமகன் என்ற அடைமொழியுடன் அழைக்கப்பட்டார்.

இங்கிலாந்து ராணி 2ஆம் எலிசபெத் - இளவரசர் பிலிப் தம்பதிக்கு, இளவரசர் சார்லஸ் உட்பட 3 மகன்களும், இளவரசி ஆனி என்ற மகளும் உள்ளனர். இளவரசர் வில்லியம் உட்பட 8 பேரக்குழந்தைகளும், 10 கொள்ளுப் பேரக்குழந்தைகளும் உள்ளனர்.

கடந்த 2017ஆம் ஆண்டு, தனது அரச பொறுப்புகளில் இருந்து இளவரசர் பிலிப் ஓய்வு பெற்றார். இதன்பின்னர், ராணி இரண்டாம் எலிசபெத்தோடு, பொது நிகழ்ச்சிகளில் அரிதாகவே கலந்து கொண்டார்.

கடந்த சில மாதங்களாக இதயப் பிரச்சனை உள்ளிட்ட உடல் உபாதைகளால் பாதிக்கப்பட்ட இளவரசர் பிலிப், லண்டன் கிங் எட்வர்டு மருத்துவமனையில் சிகிச்சை பெற்று அண்மையில் வீடு திரும்பினார்.

இங்கிலாந்தில் மீண்டும் கொரோனா பாதிப்பு அதிகரித்து, ஊரடங்கு அமல்படுத்தப்பட்டதால், லண்டனுக்கு மேற்கே உள்ள வின்ட்சர் ((Windsor)) கோட்டையில் ராணி இரண்டாம் எலிசபெத்துடன் தங்கியிருந்தார். இந்நிலையில், வெள்ளிக்கிழமை காலை, இளவரசர் பிலிப், இயற்கை எய்தியதாக பக்கிங்காம் அரண்மனை அதிகாரப்பூர்வமாக அறிவித்துள்ளது.

வருகிற ஜூன் 10ஆம் தேதி தனது 100ஆவது பிறந்தநாளை கொண்டாட இருந்த நிலையில் இளவரசர் பிலிப் இயற்கையோடு கலந்துள்ளார். அவரது மறைவுக்கு பிரதமர் மோடி மற்றும் உலக தலைவர்கள் இரங்கல் தெரிவித்துள்ளனர்.