தி.மு.க. ஆட்சியில் வாக்குறுதிகளை நிறைவேற்றவில்லை; தமது அரசு தொலைநோக்குப் பார்வையுடன் செயல்படுவதாக முதலமைச்சர் பெருமிதம்..!

Mar 13, 2021 07:15:42 AM 0 3541

தமது அரசு தொலைநோக்குப் பார்வையுடன் திட்டங்களை நிறைவேற்றி வருவதாக முதலமைச்சர் எடப்பாடி பழனிசாமி கூறியுள்ளார். தி.மு.க. ஆட்சியில் வாக்குறுதிகளை நிறைவேற்றவில்லை எனவும் அவர் குற்றம் சாட்டினார்.

சேலம் மாவட்டம் ஆத்தூர் சந்தைப்பேட்டையில் அதிமுகவேட்பாளர்கள் அறிமுக கூட்டம் நேற்றிரவு நடைபெற்றது. ஆத்தூர் வேட்பாளர் ஜெய்சங்கரன், கெங்கவல்லி வேட்பாளர் நல்லதம்பி ஆகியோரை ஆதரித்துப் பேசிய முதலமைச்சர் எடப்பாடி பழனிசாமி, ஏழை மாணவர்கள் மருத்துவக் கல்லூரியில் சேர 7.5 சதவீத உள் இட ஒதுக்கீடு செய்யப்பட்டதன் மூலம் 435 அரசு பள்ளி மாணவ மாணவிகள் மருத்துவக் கல்லூரியில் சேர்ந்ததாகக் குறிப்பிட்டார். அடுத்த ஆண்டு மேலும் 1650 மாணவர்கள் சேர்க்கப்பட உள்ளதாகவும் அவர் கூறினார்.

ஏழை எளிய மக்களின் கனவை தமது அரசு நனவாக்கி வருவதாகக் கூறிய முதலமைச்சர், புதிய திட்டங்களால் உயர்கல்வியில் மாணவர்கள் அதிகம் படிக்கும் நிலை ஏற்பட்டுள்ளதாகவும் முதலமைச்சர் தெரித்தார்.

மக்களிடையே தவறான தகவல்கள் பரப்பி வெற்றி பெறும் முயற்சி நடக்காது என்றுகூறிய முதலமைச்சர், தி.மு.க. ஆட்சிக்கு வந்தால் சட்டம் ஒழுங்கு நிலை மோசமாகும் என குற்றம் சாட்டினார்.

தமிழகம் வளர்ச்சிப்பாதையில் வீறுநடை போடுவதாகக் கூறிய முதலமைச்சர், பொது மக்களின் ஆதரவோடு அதிமுக மீண்டும் ஆட்சியைப் பிடிக்கும் என்று தெரிவித்தார்.