திமுக வேட்பாளர்கள் நேர்காணல் தொடக்கம்..!

Mar 02, 2021 09:22:12 AM 0 3173

திமுக -விருப்பமனு அளித்தவர்களுக்கான நேர்காணல் தொடக்கம்

சட்டமன்ற தேர்தலில் திமுக சார்பில் போட்டியிட விருப்ப மனு அளித்தவர்களுக்கான நேர்காணல் சென்னை அண்ணா அறிவாலயத்தில் தொடங்கி நடைபெற்று வருகிறது.

கடந்த 17-ம் தேதி முதல் 28-ம் தேதி வரை திமுக சார்பில் போட்டியிடுபவர்களுக்கான விருப்ப மனு விநியோகிக்கப்பட்டது. விருப்ப மனு அளித்தவர்களிடம் திமுக தலைவர் மு.க. ஸ்டாலின், பொதுச்செயலாளர் துரைமுருகன் ஆகியோர் நேர்காணலை நடத்தி வருகின்றனர்.

இன்று முதல் 6-ம் தேதி வரை மாவட்ட வாரியாக நேர்காணல் நடத்தப்பட உள்ள நிலையில், முதல்கட்டமாக இன்று காலை கன்னியாகுமரி, தூத்துக்குடி, நெல்லை, தென்காசி, ராமநாதபுரம் ஆகிய மாவட்டங்களை சேர்ந்தவர்களுக்கு நேர்காணல் நடத்தப்பட்டு வருகிறது.

இரண்டாம் கட்டமாக மாலை விருதுநகர், சிவகங்கை, தேனி, திண்டுக்கல் ஆகிய மாவட்டங்களை சேர்ந்தவர்களுக்கு நேர்காணல் நடத்தப்படுகிறது. நேர்காணலுக்கு வந்தவர்களிடம் அவர்கள் விருப்பம் தெரிவித்துள்ள தொகுதியில் திமுகவின் வெற்றி வாய்ப்பு எப்படி இருக்கிறது உள்ளிட்டவை குறித்து விவாதிக்கப்படுகிறது.

நேர்காணலில் தற்போதைய திமுக சட்டமன்ற உறுப்பினர்கள் ஆஸ்டின், மனோ தங்கராஜ், அனிதா.ராதாகிருஷ்ணன், கீதா ஜீவன், பூங்கோதை ஆலடி அருணா உள்ளிட்டோர் பங்கேற்றுள்ளனர்.