பிப்ரவரி 30 - ம் தேதி வழங்கப்பட்ட இறப்பு சான்றிதழ்... தவிக்கும் மகன்!

Feb 22, 2021 11:16:13 AM 0 72320

விருதுநகரில் உள்ள தாசில்தார் அலுவலகத்தில், உலகிலேயே இல்லாத ஒரு தேதியைக் குறிப்பிட்டு, இறப்பு சான்றிதழ் வழங்கிய சம்பவம் அரங்கேறியுள்ளது.

பிரபல தமிழ்ப்பட நகைச்சுவை காட்சி ஒன்றில், நடிகர் வடிவேலுவிடம், வாங்கிய கடனை எப்போ தருவ என்று கடன்காரர் கேட்கவரும்போது, பிப்ரவரி 30 ம் தேதி தருகிறேன் என்று கூறி அனுப்புவார். அதேபோல ஒரு சம்பவம் விருதுநகரிலும் நடந்துள்ளது,

விருதுநகர் மாவட்டம் பெயம்பட்டியைச் சேர்ந்த கூலித்தொழிலாளி அழகர்சாமி. இவர் 2000 ம் ஆண்டு இறந்துவிட்டார். அண்மையில், அழகர் சாமியின் இளைய மகன் உதயகுமார், கடன் வாங்குவதற்காகத் தனியார் வங்கியின் உதவியை நாடியுள்ளார். அப்போது, வங்கி அதிகாரிகள் அவரிடம் வாரிசு சான்றிதழ் கேட்டுள்ளனர். இதனைத் தொடர்ந்து, உதயகுமாரும் வங்கி அதிகாரிகளிடம் வாரிசு சான்றிதழை வழங்கியுள்ளார்.

அதை அதிகாரிகள் சரிபார்த்தபோது, உதயகுமாரின் தந்தை அழகர்சாமி இறந்த தேதி 30.02.2000 என்று குறிப்பிடப்பட்டிருந்தது . இதனைக் கண்ட வங்கி அதிகாரிகள் உதயகுமாருக்குக் கடன் தர மறுத்துவிட்டனர். வாரிசு சான்றிதழ் மட்டும் அல்ல, அழகர் சாமியின் இறப்பு சான்றிதழிலும் அவர் இறந்த தேதி தவறாகக் குறிப்பிடப்பட்டிருந்தது.

இதனைத் தொடர்ந்து, உதயகுமார் தாசில்தார் அலுவலகத்தில் புகார் அளித்துள்ளார். அதிகாரிகள், உதயகுமாரின் தந்தை அழகர்சாமியின் இறப்பு சான்றிதழ் விரைவில் மாற்றித் தரப்படும் என்று கூறியுள்ளனர்.

உலகிலேயே இல்லாத ஒரு தேதியைக் குறிப்பிட்டு இறப்பு சான்றிதழ் வழங்கப்பட்ட சம்பவம், விருதுநகர் பகுதியில் சர்ச்சையை ஏற்படுத்தியுள்ளது.