'தற்கொலைக்கு முயற்சிக்கவில்லை!' - பூங்கோதை விளக்கம்

தன் உடல் நிலை குறித்து தவறான தகவல்களைப் பரப்ப வேண்டாமென்று தி.மு.க எம்.எல்.ஏ பூங்கோதை ஆலடி அருணா வேண்டுகோள் விடுத்துள்ளார்.

இது குறித்து தன் பேஸ்புக் பக்கத்தில் பூங்கோதை அளித்துள்ள விளக்கம் : 'கடந்த 19.11.2020, ஆலங்குளத்தில் காலை 6 மணியளவில் உடல்நலக் குறைவு காரணமாக மயங்கி விழுந்துள்ளேன். என்னுடைய பணியாளர்கள் உடனடியாக சீபா மருத்துவமனையில் சேர்த்துள்ளார்கள். இரத்த பரிசோதனையில் என் உடலில் இரத்தம் உறையும் தன்மை குறைவாகவும், சர்க்கரை அளவு குறைவாகவும் இருந்தது கண்டறியப்பட்டது. மூளை, நெஞ்சு பகுதிகள் சி.டி ஸ்கேன் எடுக்கப்பட்டு தக்க சிகிச்சை அளிக்கப்பட்டு வருகிறது.

நடந்த இந்த உண்மைச் சம்பவத்தை மறைத்து தவறாக திரித்து நான் ஏதோ தற்கொலை செய்து கொள்ள முயச்சித்தது போல் பொய்யுரை பரப்புவது மிகுந்த வேதனை அளிக்கிறது. டாக்டர். கலைஞர் அவர்கள் என்னை அமைச்சராக நியமித்து அழகு பார்த்தார். கலைஞர் என்னை தன் மகளைப் போல் எப்படி பாசத்துடன் நடத்தினாரோ, அதேபோல கழகத் தலைவர் அண்ணனும் என் மீது பாசமாக இருக்கிறார்.

எனக்கு சட்டமன்ற உறுப்பினராக, மாநில மருத்துவ அணி தலைவராக பணியாற்ற வாய்ப்பளித்து என் வளர்ச்சிக்கு உறுதுணையாக இருந்து வருகிறார். இத்தகைய சூழலில் கழகத்திற்கு ஊறுவிளைவிக்கும் வண்ணம் தவறான செய்திகளைப் பரப்ப வேண்டாம் என்று கேட்டுக் கொள்கிறேன். தற்போது நான் சென்னை அப்போலோ மருத்துவமனையில் எனக்கு ஏற்பட்ட திடீர் மயக்கத்துக்கான மருத்துவ காரணங்களை அறிய அனுமதிக்கப்பட்டு சிகிச்சை பெற்று வருகிறேன்.'' என்று அறிக்கையில் தெரிவித்துள்ளார்.