தீபாவளிக்கு பொருட்களை வாங்க கடைவீதிகள் தோறும் மக்கள் கூட்டம்... களை கட்டியது தீபாவளி விற்பனை..!

நாளை விடிந்தால் தீபாவளி என்ற நிலையில் பொருட்கள் வாங்குவதற்காக தமிழகத்தின் பல்வேறு ஊர்களிலும் மக்கள் கூட்டம் அலைமோதியது...

சென்னை:

சென்னை தியாகராயநகர், புரசைவாக்கம், வண்ணாரப்பேட்டை உள்ளிட்ட இடங்களில் புத்தாடைகள் வாங்க மக்கள் திரண்டனர். காவல்துறை சார்பில் உயர் கோபுரம் அமைக்கப்பட்டு, கண்காணிப்பு பணியில் போலீசார் ஈடுபட்டனர்.

தாம்பரம்:

தாம்பரம் சந்தையில் தீபாவளி பொருட்களை வாங்க ஏராளமானோர் குவிந்தனர். மக்கள் கூட்டத்தை ஒலிப்பெருக்கி வாயிலாக போலீசார் ஒழுங்குபடுத்தினர்.

ஈரோடு:

தீபாவளியை முன்னிட்டு, ஈரோடு மணிக்கூண்டு அருகே உள்ள ஜவுளிக்கடைகளில் மக்கள் கூட்டம் அலைமோதியது. கூட்ட நெரிசலைக் கட்டுப்படுத்த, பல சாலைகளில் போக்குவரத்து மாற்றம் செய்யப்பட்டது.

நெல்லை:

நெல்லை மாநகர கடை வீதிகளில் சாரல் மழையையும் பொருட்படுத்தாமல் தீபாவளி பொருட்களை வாங்க மக்கள் குவிந்தனர். கடைகளில் விற்பனையும் அமோகமாக நடைபெற்றது.

கோவை:

கோவையில் ஒப்பணக்கார வீதி, பெரிய கடை வீதி, ராஜவீதி உள்ளிட்ட இடங்களில் புத்தாடைகள், பட்டாசுகள், மளிகை பொருட்கள் வாங்க பொதுமக்கள் குவிந்தனர்.

சேலம்:

சேலம் சி.சி ரோடு, சின்னக்கடை வீதி, வ.உசி .பூ .மார்க்கெட் உள்ளிட்ட பகுதிகளில் கூட்டம் அதிகம் காணப்பட்டது. 1100 போலீசார் குவிக்கப்பட்டு கண்காணிப்பில் ஈடுபட்டுள்ளனர்.

திருச்சி: 

திருச்சி சின்னக்கடை வீதி உள்ளிட்ட பிரதான பகுதிகளில் இறுதிக்கட்ட வியாபாரம் களைகட்டியது.

மதுரை:

மதுரை விளக்குதூண் பகுதியில் துணிமணிகள் மற்றும் வீட்டுக்கு தேவையான பொருள்கள் வாங்க மக்கள் கூட்டம் அலைமோதியது.

தஞ்சை:

தஞ்சையில் புத்தாடை, பட்டாசு அழகு சாதன பொருட்கள் வாங்க மக்கள் திரண்டனர். பூச்சந்தையிலும் ஏராளமானோர் குவிந்தனர். மல்லி முல்லை செவ்வந்தி பூக்களின் விலை உயர்ந்துள்ளதால் பூ வியாபாரிகள் மகிழ்ச்சி அடைந்துள்ளனர்

புதுச்சேரி:

புதுச்சேரியின் பிரதான கடை வீதிகளான காந்தி வீதி, நேரு வீதி உள்ளிட்ட பகுதிகளில் உள்ள கடைகளில் தீபாவளி விற்பனை களைகட்டியது. கொரோனா பரவலை தடுக்க பொதுமக்கள் முகக்கவசம் அணியுங்கள் என்று போலீசார் விழிப்புணர்வை ஏற்படுத்தினர்.