ரூ. 75 கோடி மதிப்பில் புதிய புகாட்டி கார்... புக் செய்த ரொனால்டோ!

இத்தாலி சீரி ஏ கால்பந்து தொடரில் ரொனால்டோ விளையாடி வரும் யுவென்டஸ் அணி 36- வது முறையாக சாம்பியன் பட்டத்தை கைப்பற்றியது. இந்த வெற்றியை கொண்டாடும் விதமாக யுவென்டஸ் அணியின் ஸ்ட்ரைக்கர் கிறிஸ்டியானோ ரொனால்டோ ,புகாட்டி சென்டோடிஸி ரக காரை புக் செய்துள்ளார். இந்த ஸ்போர்ட்ஸ் ரக காரின் விலை ரூ. 75 கோடி ஆகும்.

உலகில் இந்த ரக கார்கள் மொத்தம் 10 மட்டுமே தயாரிக்கப்பட்டுள்ளன. கிட்டத்தட்ட 1,600 குதிரைத்திறன் கொண்ட இந்த கார் மணிக்கு 380 கிலோ மீட்டர் வேகத்தில் செல்லும். காரை ஸ்டார்ட் செய்த 2.4 விநாடியில் 60 கி.மீ வேகத்தை எட்டும் திறன் கொண்டது. 13.1 விநாடியில் 186 கிலோ மீட்டர் வேகத்தை எட்டும். அடுத்த ஆண்டு இந்த கார் ரொனால்டோவுக்கு வழங்கப்படும்.

ஏற்கெனவே, ரொனால்டோவிடத்தில் Chiron, Veyron ரக புகாட்டி கார்கள் உள்ளன. இதுதவிர, பாந்தம் ரோல்ஸ் ராய்ஸ், லம்போகினி ஏவென்டாடர், மெக்லரைன் சென்னா, ஃபெராரி எப் 430, பென்ட்லி உள்ளிட்ட ஏராளமான விலையுயர்ந்த கார்கள் உள்ளன. இவற்றின் மெத்த மதிப்பு ரூ. 264 கோடி ஆகும்.