வேடந்தாங்கல் சரணாலயம்.. பாதுகாப்புப் பகுதி குறைப்பு?
வேடந்தாங்கல் பறவைகள் சரணாலயத்தின் பாதுகாப்பு வளைய பரப்பை சுருக்குவது தொடர்பாக தமிழக அரசு மத்திய அரசிடம் அனுமதி கேட்டிருப்பது அதிர்ச்சியளிப்பதாக சுற்றுச்சூழல் ஆர்வலர்கள் தெரிவித்துள்ளனர்.
செங்கல்பட்டு அருகே அமைந்துள்ள வேடந்தாங்கல் பறவைகள் சரணாலயம், ஆயிரக்கணக்கான வெளிநாட்டுப் பறவைகளுக்கு புகலிடமாக திகழ்ந்து வருகிறது. ஹெக்டேர் பரப்பளவில் பரந்து விரிந்திருக்கும் வேடந்தாங்கல் பறவைகள் சரணாலயத்தைச் சுற்றிலும் 5 கிலோ மீட்டர் தூரத்துக்கு பாதுகாக்கப்பட்ட பகுதியாக வனத்துறை அறிவித்துள்ளது.
இந்த பரப்புக்குள் தொழிற்சாலைகளோ, மின் கோபுரமோ, அடுக்குமாடி குடியிருப்புகளோ அமைக்கப்படக் கூடாது என விதிகள் வகுக்கப்பட்டுள்ளன. இந்த நிலையில் சரணாலயத்தின் எல்லைகளை மறுவரையறை செய்யுமாறு வனத்துறையிடமிருந்து வந்த முன்மொழிவுக்கு, வனவிலங்குகளுக்கான மாநில வாரியம் ஒப்புதல் அளித்துள்ளது. தேசிய வனவிலங்குகள் வாரியத்துக்கும் இது தொடர்பாக கடிதம் அனுப்பப்பட்டுள்ளதாகக் கூறப்படுகிறது.
வணிக மற்றும் தொழில்துறை சார்ந்த நடவடிக்கைகளுக்கு அனுமதி வழங்கவே இந்த முடிவை எடுத்துள்ளதாக அரசுத் தரப்பில் கூறப்படுகிறது. ஆனால் சரணாலயத்தின் பாதுகாப்புப் பரப்பை ஒட்டியுள்ள எல்லைப் பகுதியில் தனியார் மருந்து தயாரிப்பு நிறுவனம் ஒன்று இயங்கி வருவதாகவும் அதனை விரிவாக்கம் செய்யும் பணிக்காகவே, இந்த நடவடிக்கைகள் எடுக்கப்பட்டு வருவதாகவும் சுற்றுச்சூழல் ஆர்வலர்கள் குற்றம்சாட்டுகின்றனர்.
ஏற்கனவே வேடந்தாங்கல் பறவைகள் சரணாலயத்துக்கு வரும் பறவைகளின் வரத்து குறைந்து வருவதாகக் கூறும் அவர்கள், அதன் பாதுகாப்பு வளையப் பரப்பு சுருக்கப்பட்டால் அது மேலும் பல கேடுகளை விளைவிக்கும் என்றும் வேதனை தெரிவிக்கின்றனர்.
Comments