கொத்துக் கொத்தாய் மரணம்.... கொடூர முகம் காட்டும் கொரோனா...!

Apr 22, 2020 08:00:03 AM 0 4589

உலக அளவில் பாதிப்பு எண்ணிக்கை 25.5 லட்சத்தை கடந்தது

உலக அளவில் கொரோனா தொற்றுக்கு உயிரிழந்தவர்களின் எண்ணிக்கை ஒரு லட்சத்து 77 ஆயிரத்தைக் கடந்துள்ள நிலையில், பாதிக்கப்பட்டவர்களின் எண்ணிக்கை 25 லட்சத்து 56 ஆயிரமாக உயர்ந்துள்ளது

மனித குலத்துக்கு கண்ணுக்கு தெரியாத புதிய எதிரியாக உருவெடுத்து கொரோனா வைரஸ் பேரிழப்பை ஏற்படுத்தி வருகிறது. உலகம் முழுவதும் கொரோனா வைரசால் பாதிக்கப்பட்டவர்களின் எண்ணிக்கை 25 லட்சத்து 56 ஆயிரத்தைத் தாண்ட, பலியானோரின் எண்ணிக்கை ஒரு லட்சத்து 77 ஆயிரத்தை தாண்டியுள்ளது. இதுவரை இல்லாத அளவு 24 மணி நேரத்தில் 6 ஆயிரம் பேர் வரை பலியாகி இருப்பது உலக நாடுகளை அதிர்ச்சியில் ஆழ்த்தி உள்ளது.

உலக அளவில் அதிகபட்சமாக அமெரிக்காவில் 8 லட்சத்து 18 ஆயிரத்திற்கும் மேலானோர் கொரோனாவால் பாதிக்கப்பட்டுள்ளனர். ஸ்பெயினில் 2 லட்சத்துக்கு மேற்பட்டோரும், இத்தாலியில் ஒரு லட்சத்து 83 ஆயிரத்துக்கு மேற்பட்டோருக்கும், பிரான்சில் ஒரு லட்சத்து 58 ஆயிரத்துக்கு மேற்பட்டோருக்கு கொரோனா நோய் தொற்று உறுதி செய்யப்பட்டுள்ளது. ஜெர்மனியில் சுமார் ஒரு லட்சத்து 48 ஆயிரம் பேரும், பிரிட்டனில் ஒரு லட்சத்து 29 ஆயிரம் பேரும் கொரோனாவால் பாதிக்கப்பட்டுள்ளனர்.

இதனிடையே, அமெரிக்காவில் பலி எண்ணிக்கை 45 ஆயிரத்து 300ஐயும், ஸ்பெயினில் 21 ஆயிரத்தையும், இத்தாலியில் 24 ஆயிரத்தையும் தாண்டியுள்ளது. பிரான்ஸ் நாட்டில் பலி எண்ணிக்கை 20 ஆயிரத்தையும், பிரிட்டனில் 17 ஆயிரத்து 300 கடந்துள்ளது.

உலகின் பல்வேறு நாடுகளிலும் கொரோனா நோயிலிருந்து 6 லட்சத்து 90 ஆயிரம் பேர் குணமடைந்துள்ளனர். சுமார் 16 லட்சத்து 88 ஆயிரம் பேர் சிகிச்சை பெறும் நிலையில், 57 ஆயிரம் பேர் கவலைக்கிடமாக இருப்பதாக புள்ளி விவரங்கள் தெரிவிக்கின்றன.