"விஜய் வரி ஏய்ப்புச் செய்யவில்லை" - விசாரணைக்குப் பின் IT தகவல்

Mar 12, 2020 07:23:35 PM 0 6724

நடிகர் விஜய் வீட்டில், சீலிடப்பட்ட லாக்கரில் இருந்து ஆவணங்களை கைப்பற்றி வருமான வரித்துறை அதிகாரிகள் மீண்டும் விசாரணை மேற்கொண்டனர். இதுதொடர்பாக தகவல் வெளியிட்ட வருமானவரித்துறை, நடிகர் விஜய் வரி ஏய்ப்பு செய்யவில்லை எனக் கூறியுள்ளது.

பிகில் பட வருவாயை மறைத்து வரி ஏய்ப்பு செய்ததாக எழுந்த புகாரில் கடந்த மாதம் ஏ.ஜி.எஸ். நிறுவனம், பைனான்சியர் அன்புச் செழியன், நடிகர் விஜய் ஆகியோர் இடங்களில் வருமான வரித்துறை சோதனை நடைபெற்றது. அப்போது மாஸ்டர் பட பரிவர்த்தனை தொடர்பான ஆவணங்கள் விஜய் வீடு மற்றும் அலுவலகத்தில் இருந்து பறிமுதல் செய்யப்பட்டன. மேலும் விஜய் வீட்டில் சில ஆவணங்களுக்கு சீல் வைக்கப்பட்டு அவற்றை வெளியே எடுக்க தடை உத்தரவும் பிறப்பிக்கப்பட்டது.

இந்நிலையில் சென்னையை அடுத்த பனையூரில் நடிகர் விஜய் வீட்டில் 8-க்கும் மேற்பட்ட வருமான வரித்துறை அதிகாரிகள் விசாரணை மேற்கொண்டனர். மாஸ்டர் பட இணை தயாரிப்பாளர் லலித்குமார் வீட்டில் நடத்தப்பட்ட விசாரணையில் கிடைத்த தகவலின் அடிப்படையிலும் விஜய் வீட்டில் உள்ள அலுவலர்களிடம் விசாரணை நடைபெற்றதாகக் கூறப்படுகிறது.

இந்நிலையில் நடிகர் விஜய் பிகில் படத்திற்கு 50 கோடி ரூபாயும், மாஸ்டர் படத்திற்கு 80 கோடி ரூபாயும் ஊதியமாக பெற்றுள்ளதாகவும், 2 திரைப்பட வருவாய்க்கும் அவர் முறையாக வரி செலுத்தியுள்ளதாகவும் வருமான வரித்துறையினர் தெரிவித்துள்ளனர்.