20 ஓவர் வடிவிலான T 20 கிரிக்கெட் போட்டிகளில் இந்தியா தன் ஆதிக்கத்தை தொடர்ந்து வலிமையாக நிரூபித்து வருகிறது.
இப்போது நடந்துகொண்டிருக்கும் ஆஸ்திரேலிய தொடரில் ஒரு நாள் தொடரை 2-1என இழந்திருந்தாலும் T20 தொடரை இன்றைய வெற்றியின் மூலம் கைப்பற்றியுள்ளது.
T 20 யில் இது இந்திய கிரிக்கெட் அணியின் தொடர்ச்சியான 10 வது வெற்றியாகும். கடந்த வருடம் மும்பையில் மேற்கு இந்திய தீவுகளை வென்ற இந்தியா பிறகு 2-0 என்ற கணக்கில் இலங்கையையும் 5-0 என்ற கணக்கில் நியூஸிலாந்தையும் வென்றது. தற்போது ஆஸ்திரேலியாவை அதன் மண்ணிலேயே தொடர்ந்து 2 போட்டிகளில் வென்று இந்த தொடரையும் கைப்பற்றி சாதனை புரிந்துள்ளது.
ஆஸ்திரேலியாவுடனான இரண்டாவது ஆட்டத்தில் 194 ரன்களை விரட்டி பிடித்ததன் மூலம், இது வரை 7 முறை 190 க்கும் அதிகமான ரன்களை வெற்றிகரமாக சேசிங் செய்த ஒரே நாடாக இந்தியா திகழ்கிறது. அதிலும் கிரிக்கெட் ஜாம்பவானான ஆஸ்திரேலியாவை, 2013 ல் ராஜ்கோட்டில் 201 ரன்களையும் , 2016 ல் இதே சிட்னி மைதானத்தில் 198 ரன்களையும் இப்போது 194 ரன்களையும் விரட்டிப்பிடித்து, ஆஸ்திரேலியாவின் 190 க்கும் அதிகமான அதிக பட்ச ஸ்கோர்களை 3 முறை சேசிங் செய்து வெற்றிப்பெற்ற ஒரே நாடும் இந்தியாதான்.
அதே போல் இந்தியா தொடர்ச்சியாக வென்றுள்ள 5 வது T20 தொடர் இதுவாகும். கடைசியாக ஆடியுள்ள தொடர்களில் வங்கதேசம்,மேற்கு இந்திய தீவுகள், இலங்கை நியுசிலாந்து ஆஸ்திரேலியா ஆகிய நாடுகளை வீழ்த்தியுள்ளது. கடைசி 7 தொடர்களில் ஒன்றில் கூட தோற்றதில்லை.5 தொடர்களுக்கு முன்னாள் மேற்கு இந்திய தீவுகளை வென்ற இந்திய அணி அடுத்து தென் ஆப்பிரிக்காவிடம் மட்டும் 1-1 என்று சமன் செய்திருந்தது.
தென் ஆப்பிரிக்கா, இங்கிலாந்து,நியுசிலாந்து மற்றும் ஆஸ்திரேலியா நாடுகளான SENA நாடுகளை 20 வடிவ போட்டிகளில் வென்ற ஒரே கேப்டன் என்ற பெருமை இந்திய அணியின் விராட் கோலியைத்தான் சேரும்.