ஜெட் பேக் இயந்திரம் மூலம் புதிய உச்சத்தை அடைந்த இளைஞர்

ஜெட் பேக் எனப்படும் நவீன இயந்திரம் மூலம் இதுவரை மனிதர்கள் பறக்காத உயரத்தை இளைஞர் ஒருவர் எட்டியுள்ளார்.

காற்றை உள்ளிழுத்து பின் அதிவேகமாக வெளித்தள்ளும் ஜெட் பேக் இயந்திரம் மூலம் அவ்வப்போது சோதனை ஓட்டங்கள் நடந்து வந்தாலும் தற்போது புதிய சாதனை படைக்கப்பட்டுள்ளது.

பிரான்ஸைச் சேர்ந்த வின்ஸ் ராபெஃட் என்பவர் அவ்வப்போது ஜெட் பேக் மூலம் பறந்து வருகிறார். இந்நிலையில் துபை சென்ற அவர், அங்கு பட்டத்து இளவரசர் முகம்மத் பின் மக்தூம் முன்னிலையில் பறக்கத் தொடங்கினார்.

மணிக்கு 250 கிலோ மீட்டர் வேகத்தில் பறந்த அவர், புதிய உச்சமாக சில நொடிகளில் 6 ஆயிரம் அடி உயரத்தைத் தாண்டிச் சென்றார். ஜெட் பேக் முறையில் இதுவரை தொடாத உயரத்தை வின்ஸ் பிடித்துள்ளார். சுயமாகவும், தரையிலிருந்து ரிமோட் மூலமும் இந்த ஜெட் பேக்கை இயக்கமுடியும் என்பது குறிப்பிடத்தக்கது.