ஜம்மு - காஷ்மீரின் ஸ்ரீநகர் அருகே தீவிரவாதிகள் நடத்திய கையெறி குண்டு தாக்குதலில் 2 சிஆர்பிஎப் வீரர்கள் உட்பட 6 பேர் காயமடைந்தனர்.
லால் சௌக் அடுத்த பிரதாப் பூங்கா பகுதியில் வழக்கம்போல் கண்காணிப்பு பணியில் ஈடுபட்டிருந்த சிஆர்பிஎப் வீரர்கள் மீது, திடீரென கையெறி குண்டுகளை வீசித் தாக்குதல் நடத்திய தீவிரவாதிகள் அங்கிருந்து தப்பிச் சென்றனர்.
அதில் சிஆர்பிஎப் வீரர்கள் இருவரும், பொதுமக்கள் 4 பேரும் காயமடைந்தனர். காயமடைந்தவர்களை மீட்ட ஜம்மு - காஷ்மீர் போலீசார் மருத்துவமனையில் அனுமதித்தனர்.
ஞாயிறு சந்தையை முன்னிட்டு பரபரப்பாக காணப்பட்ட பகுதியில் திடீரென பயங்கர சத்தத்துடன் குண்டு வெடித்ததால், அங்கிருந்த பொதுமக்கள் பீதியடைந்தனர். இதையடுத்து அப்பகுதி பாதுகாப்பு படையினரின் கட்டுப்பாட்டுக்குள் கொண்டுவரப்பட்டுள்ளது.