மும்பையை தலைமையிடமாகக் கொண்ட நிதி நிறுவனம் 28ஆயிரம் கோடி ரூபாய் மோசடி செய்த விவகாரத்தில் தமிழக சிபிசிஐடி பொருளாதார குற்றப்பிரிவு போலீசார் வழக்குப் பதிவு செய்துள்ளனர்.
மும்பையை தலைமையிடமாகக் கொண்டு செயல்படும் ஃப்ராங்க்ளின் டெம்பிள்டன் மேனேஜ்மென்ட் இந்தியா நிறுவனத்தில் 40 லட்சத்திற்கும் மேற்பட்டோர் பல லட்சம் கோடி ரூபாயை முதலீடு செய்துள்ளனர்.
தமிழகத்திலும் இந்நிறுவனத்துக்கு14 க்கும் மேற்பட்ட கிளைகள் உள்ளன. இந்நிலையில் கடந்த ஏப்ரல் மாதம் 6 நிதி திட்டத்தை, நஷ்டம் அடைந்ததாக கணக்குக் காட்டி இந்நிறுவனம் திடீரென நிறுத்தியுள்ளது.
இந்த ஆறு நிதித் திட்டத்தில் மட்டும் இந்தியா முழுவதும் 3 லட்சம் முதலீட்டாளர்கள் உள்ளனர். தமிழகத்தில் 50 ஆயிரத்திற்கும் மேற்பட்ட முதலீட்டாளர்கள் உள்ளனர். சுமார் 28 ஆயிரம் கோடி ரூபாய் இந்த ஆறு நிதித் திட்டத்தின் கீழ் முதலீடு செய்யப்பட்டுள்ளது.
இதனை அடுத்து இந்தியா முழுவதும் முதலீட்டாளர்கள் அந்தந்த மாநிலத்தில் புகார் அளித்தனர். அந்தந்த மாநிலத்தில் உயர் நீதிமன்றங்களிலும் வழக்குகள் தொடரப்பட்டது.
சென்னை உயர் நீதிமன்றத்திலும் வழக்கு தொடரப்பட்டுள்ளது.குறிப்பாக இந்த நிதி நிறுவனத்தில் முதலீடு செய்த முதலீட்டாளர்களுக்காக சென்னை ஃபைனான்ஷியல் மார்க்கெட் அண்ட் அக்கவுண்டபிலிடி என்ற நிறுவனத்தின் மூலம் முதலீட்டாளர்கள் சிபிசிஐடி போலீசாரிடம் புகார் அளித்துள்ளனர்.
இந்த புகாரின் அடிப்படையிலும், நீதிமன்ற உத்தரவின் அடிப்படையிலும், சிபிசிஐடி யில் உள்ள பொருளாதார குற்றப்பிரிவு போலீசார் ஃப்ராங்க்ளின் டெம்பிள்டன் அசஸ்மண்ட் மேனேஜ்மண்ட் என்ற நிறுவனத்தின் மீது 28 ஆயிரம் கோடி ரூபாய் முறைகேடு விவகாரத்தில், இந்த நிறுவனத்தின் நிர்வாக இயக்குனர் சந்தோஷ் தாஸ் காமத், தலைமை முதலீட்டு அதிகாரி சஞ்சய், இயக்குனர்கள் ஜெயராம் சுப்பிரமணியம், விவேக் கு ட்வா, ஆர்.வி. சுப்பிரமணியம், பிரதீப் சா இட்ட நிர்வாகிகள் மீது வழக்கு பதிவு செய்துள்ளது.