இந்தியக் கடற்படைக்கு சொந்தமான மிக்-29கே ரக ஜெட் விமானம் கோவா அருகே விபத்துக்குள்ளானது.
இதுகுறித்த தகவலை வெளியிட்டுள்ள இந்திய கடற்படை, கோவா அருகே வழக்கமான ரோந்து பணியில் ஈடுபட்டிருந்த போது காலை 10.30 மணியளவில் விமானம் விபத்துக்குள்ளானதாக தெரிவித்துள்ளது.
மேலும் இந்த விபத்தில் உயிரிழப்புகள் எதுவும் ஏற்படவில்லையென்றும், விமானியும் பாராசூட் மூலம் குதித்து பாதுகாப்பான முறையில் உயிர்தப்பியதாகவும் கூறப்பட்டுள்ளது. அதுமட்டுமின்றி விபத்து குறித்து விசாரணைக்கும் உத்தரவிடப்பட்டுள்ளது.
கடந்த ஆண்டு நவம்பர் மாதத்தில் கோவா அருகே கிராமப் பகுதியில் மற்றொரு மிக்-29கே ரக விமானம் விபத்துக்குள்ளான நிலையில், அடுத்த 3 மாதங்களில் தற்போது மீண்டும் விபத்து நிகழ்ந்துள்ளது.