ஜம்மு - காஷ்மீரின் பூஞ்ச் மாவட்டத்தில், ராணுவ வீரர்கள் மீது தாக்குதல் நடத்திய பயங்கரவாதிகளை பிடிக்க, டிரோன்கள், ஹெலிகாப்டர் உதவியுடன் பாதுகாப்பு படையினர் தீவிர தேடுதல் வேட்டை நடத்தி வருகின்றனர்.
நேற்று மெந்தர் பகுதியில் நடந்த பயங்கரவாதத் தாக்குதலில் 5 இராணுவ வீரர்கள் உயிரிழந்தனர். இத்தாக்குதலில் பாகிஸ்தானில் இருந்து ஊடுருவிய 6 முதல் 7 பயங்கரவாதிகள் அடங்கிய குழு ஈடுபட்டிருக்கலாம் என பாதுகாப்பு படையினருக்கு தகவல் கிடைத்துள்ளதாக தெரிவிக்கப்பட்டுள்ளது.
பயங்கரவாதிகள் லஷ்கர் இ தொய்பா அமைப்பைச் சேர்ந்தவர்களாக இருக்கக்கூடும் என பாதுகாப்பு படையினர் சந்தேகிக்கும் நிலையில், அவர்கள் இருகுழுக்களாக பிரிந்து ரஜோரி மற்றும் பூஞ்ச் பகுதிகளில் இருப்பதாக தகவல் கிடைத்துள்ளது. இதனையடுத்து, சந்தேகத்திற்குரிய பகுதியில் ராணுவம், உளவுத்துறை அதிகாரிகள் இணைந்து விரிவான தேடுதலில் ஈடுபட்டுள்ளனர்.