பணி அழுத்தம் காரணமாக மின் நிலைய வளாகத்திலேயே தூக்கிட்டுத் தற்கொலை செய்துகொண்ட உதவி பொறியாளர்

வடசென்னை அனல் மின் நிலையத்தில் பணியாற்றி வந்த உதவி பொறியாளர் ஒருவர் பணி அழுத்தம் காரணமாக மின் நிலைய வளாகத்திலேயே தூக்கிட்டுத் தற்கொலை செய்துகொண்டதாகக் கூறப்படும் சம்பவம் குறித்து விசாரணை நடைபெற்று வருகிறது.

ஸ்ரீபெரும்புதூரைச் சேர்ந்த ஹரிகிருஷ்ணன் என்ற அந்த நபர், ஊழியர்களுக்கான குடியிருப்பில் தங்கி இருந்து வேலைக்குச் சென்று வந்துள்ளார். கடந்த 2 நாட்களாக அவரிடமிருந்து செல்போன் அழைப்பு எதுவும் வராததால் சந்தேகமடைந்த உறவினர்கள், அனல் மின்நிலையத்துக்கு நேரடியாகச் சென்று விசாரித்துள்ளனர்.

மின் நிலையம் முழுவதும் தேடிப் பார்த்ததில், ஓரிடத்தில் ஹரிகிருஷ்ணனின் உடல் தூக்கில் தொங்கியவாறு கிடந்துள்ளது. அவர் எழுதியதாகக் கூறப்படும் கடிதத்தில், பணி அழுத்தம் காரணமாக ஏற்பட்ட மன உளைச்சலால் தற்கொலை செய்துகொள்வதாக எழுதப்பட்டுள்ளது.