கேரளாவில் குடிபோதையில் அதிவேகமாக சென்றதோடு, பைக் மீது மோதி விபத்து ஏற்படுத்திவிட்டு நிற்காமல் சென்ற லாரி ஓட்டுநரை சக வாகன ஓட்டிகள் விரட்டி பிடித்து போலீசாரிடம் ஒப்படைத்த வீடியோ வெளியாகியுள்ளது.
கோழிக்கோடு அடுத்த உள்ளேரி பகுதியில் லாரி ஒன்று சக வாகன ஓட்டிகளை அச்சுறுத்தும் வகையில் வேகமாகவும், தாறுமாறாகவும் சென்றிருக்கிறது. அந்த லாரியை பின் தொடர்ந்து கார்கள், பைக்குகளில் சக வாகன ஓட்டிகள் விரட்டிச் சென்ற நிலையில், மின்னல் வேகத்தில் சென்ற லாரி முன்னால் சென்ற பைக் மீது மோதி 2 பேரை தூக்கி வீசியது.
விபத்துக்கு பிறகும் நிற்காமல் சென்ற லாரியை பொதுமக்கள் தொடர்ந்து விரட்டிச் சென்று பிடித்து பாலசேரி போலீசாரிடம் ஒப்படைத்தனர். இடையில் டிவைடர் மீதும் மோதிவிட்டு லாரி வேகமாக சென்றது.
விபத்தில் பைக்கில் பயணம் செய்த இரண்டு பேரும் படுகாயமடைந்து சிகிச்சைக்கு அனுமதிக்கப்பட்டனர். விசாரணையில் லாரி ஓட்டுநர் மதுபோதையில் இருந்தது தெரியவந்தது.