இட்லி வாங்க வந்தது போல் நடித்து உணவக உரிமையாளரிடம் தாலிச் செயினை பறித்துச் சென்ற கொள்ளையர்கள் !

சென்னையில் இட்லி வாங்க வந்தது போல் நடித்து உணவக உரிமையாளரிடம் இருந்து 5 சவரன் தாலிச் செயினை பறித்துச் சென்ற கொள்ளையனை பொதுமக்கள் தர்ம அடி கொடுத்து போலீசில் ஒப்படைத்தனர்.

சித்தாலப்பாக்கத்திலுள்ள ரங்கா என்ற உணவகத்துக்கு கடந்த 3 நாட்களாக சாப்பிட வருவது போல் வந்து நோட்டமிட்ட மர்ம நபர்கள் 2 பேர், மீண்டும் வந்து இட்லி ஆர்டர் கொடுத்துள்ளார். கடையின் உரிமையாளர் ராஜலட்சுமி பார்சல் கட்டிக் கொண்டிருக்கும் போது, பேச்சுக் கொடுத்து கவனத்தை திசை திருப்பிய கொள்ளையர்கள், கண்ணிமைக்கும் நேரத்தில் கழுத்தில் கிடந்த 5 சவரன் தாலிச் செயினை பறித்துக் கொண்டு தப்பியுள்ளனர்.

கொள்ளையர்களில் ஒருவன் மட்டும் பொதுமக்கள் கையில் சிக்கிக் கொண்ட நிலையில், தாலிச் செயினுடன் தப்பிச் சென்ற மற்றொரு கொள்ளையனை போலீசார் தேடி வருகின்றனர்.