புதுச்சேரியில் மேலும் ஒரு காங்கிரஸ் எம்எல்ஏ தனது பதவியை ராஜினாமா செய்ததை அடுத்து, அரசு பெரும்பான்மையை இழந்துள்ளதாக கூறி பதவி விலக எதிர்க்கட்சிகள் வலியுறுத்தியுள்ளன. ஆனால் தங்களுக்கு பெரும்பான்மை இருக்கிறது என்று முதலமைச்சர் நாராயணசாமி தெரிவித்துள்ளார்.
புதுச்சேரி சட்டமன்றத்தை பொறுத்தவரை மக்களால் தேர்ந்தெடுக்கப்பட்ட எம்.எல்.ஏ.க்கள் 30 பேர், நியமன எம்.எல்.ஏ.க்கள் 3 பேர் என 33 பேர் இருப்பார்கள். கட்சி தாவல் நடவடிக்கை காரணமாக பாகூர் தொகுதி எம்.எல்.ஏ. தனவேலுவின் பதவி கடந்த ஆண்டு பறிக்கப்பட்டது. சமீபத்தில் பா.ஜனதாவில் இணைந்த நமச்சிவாயம், தீப்பாய்ந்தான் ஆகியோர் தங்களது எம்.எல்.ஏ. பதவியை ராஜினாமா செய்தனர்.
அதைத்தொடர்ந்து மல்லாடி கிருஷ்ணாராவும் தனது எம்.எல்.ஏ. பதவியை ராஜினாமா செய்தார். இந்நிலையில், காமராஜ் நகர் தொகுதி காங்கிரஸ் எம்.எல்.ஏ. ஜான்குமார் இன்று தனது பதவியை ராஜினாமா செய்துள்ளார். சபாநாயகர் சிவக்கொழுந்தை பேரவையில் சந்தித்து தனது ராஜினாமா கடிதத்தை அவர் வழங்கினார்.
பெரும்பான்மைக்கு 15 இடங்கள் தேவை என்ற நிலையில், பேரவையில் ஆளும் காங்கிரஸ் கூட்டணியின் பலம் 14 ஆக குறைந்துள்ளது. பெரும்பான்மையை இழந்து விட்ட நாராயணசாமி தார்மீக பொறுப்பேற்று உடனடியாக தாமாக முன்வந்து ராஜினாமா செய்ய வேண்டும் என பாஜக, என்ஐஆர் காங்கிரஸ், அதிமுக தரப்பில் வலியுறுத்தப்பட்டது.
இதையடுத்து காங்கிரஸ் சட்டமன்ற உறுப்பினர்களுடன் முதலமைச்சர் நாராயணசாமி அவசர ஆலோசனை நடத்தினார். பின்னர் செய்தியாளர்களை சந்தித்த முதலமைச்சர் நாராயணசாமி, காங்கிரஸ் - திமுக கூட்டணிக்கு பெரும்பான்மை இருக்கிறது என்றார். இந்திய அரசியலமைப்பு சட்ட விதிமுறைகளுக்கு உட்பட்டு செயல்பட இருப்பதாக தெரிவித்தார்.