கணவருடன் பைக்கில் பயணித்த பெண்ணின் செயினை பறிக்க முயன்ற இருவர் கைது

திண்டுக்கல் மாவட்டம் பழனி அருகே நெய்க்காரப்பட்டியில் பெண்ணிடம் இருந்து செயினை பறிக்க முயற்சி செய்த இருவரை போலீசார் கைது செய்தனர்.

நெய்க்காரப்பட்டி ஆர்.ஆர். மில் அருகே இருசக்கர வாகனத்தில் பயணித்த தம்பதியை பின் தொடர்ந்த இருவர், பெண்ணிடம் இருந்து செயினை பறிக்க முயன்றனர்.

பெண் சப்தமிட்டதால் இருவரும் பைக்கில் வேகமாக தப்பிச் சென்றனர். இது பற்றி அறிந்த கிராமத்தினர் சிலர், கொழுமத்தில் உள்ள சோதனை சாவடிக்கு தகவல் கொடுத்தனர்.

சோதனை சாவடியை கடக்க முயன்ற இருவரையும் போலீசார் பிடித்து விசாரணை நடத்தியபோது, அங்கு சென்ற தம்பதி, குற்றவாளிகளை அடையாளம் காட்டினர்.

தொடர்ந்து பழனி தாலுக்கா போலீசார், கொழுமம் சென்று இருவரையும் கைது செய்தனர்.

விசாரணையில் இருவரும் கரூர் மாவட்டம் பள்ளப்பட்டியை சேர்ந்த உமர் முக்தார் பாரூக் மற்றும் நியாஸ்தீன் என தெரியவந்தது. அரவக்குறிச்சியில் ஆடு திருடிய வழக்குகள் இருவர் மீது நிலுவையில் இருப்பதும் விசாரணையில் அம்பலமானது.